Perdida di oido ta un condicion fisico cronico, cu den paisnan manera Merca ta esun mas comun. Pero tambe en general, perdida di oido ta un di e malesanan relaciona cu trabao mas comun, pa motibo cu empleadonan di varios sector ta enfrenta zonidonan henter dia y tur dia.
Como parti di World Hearing Day, nos ta trece dilanti varios punto relaciona cu e cuido di nos oido.
Dicon prevencion ta importante?
Casi tur perdida di oido relaciona cu trabao ta permanent, y por tin un impacto profundo riba e calidad di nos bida. Na medida cu esaki keda empeora, nos habilidad di tende y compronde otronan ta keda bira cada biaha mas dificil, cual por causa isolacion. Ademas, perdida di oido ta asocia cu disminucion di nos salud mental y problemanan di curason, manera presion di sanger halto y malesa di curason.
Tambe hopi biaha perdida di oido ta asocia cu depression, pa causa cu perdida di nos habilidad di tende por afecta con nos ta experiencia e momentonan felis den nos bida, di cual nos por sinti un falta ora cu nos musica preferi, of e stem di nos sernan keri ta cuminsa zona abao y sin calidad.
Tinnitus, cual ta un zonido constante den nos oido, cual hopi biaha ta compaña perdida di oido, por stroba nos soño y te hasta nos habilidad di concentra, sin menciona cu esaki tambe ta asocia cu ambos depresion y ansiedad. En general, perdida di oido por afecta varios, sino tur aspecto di nos bida, te hasta nos siguridad ambos na cas y na trabao.
Pa e motibonan aki, e ta hopi importante pa nos cuida di nos oido, y preveni cu gradualmente nos keda perde e habilidad bunita aki. Afortunadamente, awendia nos tin hopi strategia y tecnologia cu ta causa cu perdida di oido relaciona cu trabao casi semper por ser preveni.
Kico nos por haci pa preveni perdida di oido relaciona cu trabao?
Revisa si e zonido den bo area di trabao ta danino. Si nos tin cu hisa nos stem pa papia cu un persona cu ta na un distancia di e largura di bo man, e ta hopi probabel cu e zonido den e area ta na un nivel danino. Tambe bo por revisa e nivel di e zonido haciendo uso di un aplicacion riba bo smartphone, manera NIOSH Sound Level. En general, mester sigura cu e zonido ta bao di 85dBA.
Reduci e cantidad di tempo cu bo ta exponi na zonido. Mantene bo ekiponan den bon condicion, y si esaki ta haci hopi zonido mantene cu bon lubricacion pa esaki crea menos zonido danino cu ta posibel. Si e fuente di e zonido ta cerca di bo persona, purba crea un barera entre bo persona y e zonido aki. Semper usa proteccion den areanna unda cu zonido ta halto, cu articulonan manera foam plug. Si bo ta tendiendo musica, por ehempel cu headphone, mantene e volumen na un nivel cu ta sigur, y solamente haci uso di esaki den areanan cu no tin hopi zonido halto caba.
Ban cuida di nos oido, pa asina semper nos por tende e bunita stem di nos sernan keri.
