“Mi Mundo… Bo Mundo… Nos Mundo – Liber di Abuso y Edadismo”!!
Cada aña desde 2011 Fundacion Alzheimer Aruba (FAA) tambe ta uni cu instancianan Internacional y laga tende su bos den oposicion na abuso di adultonan mayor cu ta un violacion di derechonan humano.
Haciendo esaki FAA ta reconoce e dignidad di e Adulto Mayor y su derechonan di un bida liber di Miedo, Violencia y Abuso. E fecha aki a wordo reconoci oficialmente pa e Asamblea General di Nacionnan Uni (den su resolucion 66/127 di 19 di december 2011), como Dia Mundial di Conscientisacion riba Abuso di Adultonan Mayor. Den e resolucion aki OMS (WHO) ta enfatisa cu pa 2050, mas di 20% di e poblacion mundial lo tin 60 aña of mas. OMS ta reconoce tambe cu e aumento di e cantidad di hende di edad lo ta adultonan mayor y ta e generacion cu ta crece mas rapido den paisnan den desaroyo. OMS ta expresa su preocupacion profundo, pasobra den hopi parti di mundo e situacion di adultonan di edad ta ser afecta negativamente pa e crisis financiero y economico mundial. Mas aleu OMS ta menciona e contribucion esencial cu mayoria homber muher di edad lo sigui duna nan aporte na nan comunidad, esta SI ta establece garantia adecua. E tema di e aña aki di Nacionnan Uni ta “Serando E Circulo”: Enfoca riba Abuso dirigi na e genero di e Adulto Mayor, Maneho di vehes, Ley y contestanan basa riba evidencia.
E Abuso di un Adulto Mayor por wordo defini como “un acto unico of ripitido of falta di un accion apropia, cu ta sosode den cualkier relacion unda ta existi un expectativa di confiansa y cu ta causa daño of angustia na e Adulto Mayor”. Esaki ta un problema social global cu ta afecta salud y derechonan humano di miyones adultonan mayor den tur parti di mundo; pues, tambe na Aruba. Abuso di Adulto Mayor ta un tema cu ta merece atencion di e comunidad internacional. Den diferente parti di mundo, e abuso di Adulto Mayor ta tuma luga cu poco reconocimento of reaccion; como si fuera e ta algo normal, comun y coriente. No ta mucho tempo pasa cu e problema serio aki tabata hasta scondi den bista publico y considera como un asunto priva. Incluso awendia, e abuso di un Adulto Mayor ta sigui di ta un taboo, hasta subestima y ignora pa comunidadnan den tur parti di mundo. Sinembargo, mas y mas evidencia ta acumulando cu ta indica cu abuso di Adulto Mayor ta un problema social y sigur di salud publico.
Segun datonan di OMS: abuso emocional of psicologico ta e forma di abuso mas comun. Aki e abusado (mayoria biaha un yiu of cuidado na cas of instancia di cuido) ta somete of expone su victima na un situacion crea, cu por resulta den un trauma psicologico. E trauma aki ta encera entre otro: Ansiedad, Depresion Cronico y/of Trastorno di Stres Postraumatico (incl. problema pa drumi).
Segun rapport y datonan di OMS tin alrededor di 1 den cada 6 persona di 60+ a experiencia un of otro forma di abuso den comunidad durante aña pasa. OMS ta indica cu e tasa den casnan di cuido (incluso cuido a largo plaso) ta mas halto ainda cu esun comunitario. Aki OMS ta indica cu 1 den cada tres (3) residente di cas di anciano of nan famia a raporta casonan di abuso emocional di un Adulto Mayor aña pasa. Den un perspectiva social y di salud, aunke cu tanto den sectornan di atencion primaria di salud como servicionan/ instancianan social ta bon ekipa pa identifica y trata e problema di abuso y violencia contra Adultonan Mayor, ta sigui di ta subestima y neglisha. Ta urgente y a bira tempo pa traha hunto, diseña y construi strategianan di prevencion mas efectivo y bin cu leynan y maneho solido pa alcapara tur aspecto di abuso di Adulto Mayor. Esaki ta pa optimalisa e condicionnan di bida di adultonan mayor y permiti nan haci miho contribucion posibel na nan comunidad.
Proyecto Conscientisacion riba Abuso di Adulto Mayor
Metanan di Fundacion Alzheimer Aruba:
- “Debolbe Bos Na Nos Adultonan Mayor” (cu of sin incapacidad cognitivo).
- Motiva y conscientisa e Adulto Mayor pa para pa su derechonan y exigi un bida cu
- dignidad y di calidad, Sin “Edadismo”.
- Empodera e Adulto Mayor y Permiti cu e adulto Mayor actua riba su mes y den su propio nomber.
- Habilita e Adulto Mayor pa eherce su derechonan y defende su propio interes.
Consciencia:
- Sigura cu comunidad en general sa cu Abuso di Adulto Mayor ta tuma luga y cu e hecho
aki ta un REALIDAD y un problema serio y inaceptabel;
- Adultonan mayor mester ta consciente di e problema serio aki. Tambe e mester ta
consciente di su derechonan, di uso di servicionan y recursonan disponibel p’e.
- Nos prioridad clave ta Preveni Y Para Firme hunto cu e Adulto Mayor contra Abuso y
Violencia contra dje y asina contribui na mehora su salud, bienestar y dignidad.
- Educa comunidad pa percibi e Adulto Mayor, na un manera mas faborabel, como
contribuyente positivo na nos comunidad.
- Educa y capacita comunidad, incluso profesionalnan involucra den cuido di e Adulto
Mayor, pa reconoce y actua contra maltrato/abuso y/of sospechonan di abuso di e Adulto
Mayor.
Relacionnan intergeneracional:
- Esaki ta liga of gelink na e sensibilisacion y educacion, y pone enfasis riba e necesidad di
fomenta un contacto mas cerca y positivo entre generacionnan y fomenta relacionnan y
actitudnan positivo bou di hubentud.
- Aislamento/exclusion, isolacion social y abandono di un Adulto Mayor mester stop!
E paro aki por sosode, entre otro, a traves di relacionnan sano intergeneracional.
