Dia 4 di october ta un dia special mundialmente. Riba e dia special aki nos ta celebra nos companeronan den bida, nos amigonan cu ta brinda nos amor y lealtad incondicional, pues ta trata di Dia mundial di Bestia.
Dia mundial di Bestia ta un evento annual cu ta tuma luga dia 4 di october, unda cu nos ta celebra e derechonan y bienestar di tur bestia den mundo. E ta un dia importante cu a ser marca y celebra desde ana 1925 cu un comunidad internacional creciendo cu ta boga pa caba cu e sufrimento innecesario di tur bestia.
Pa medio di aumenta e enfoke riba e topico aki, y mehora e educacion mundialmente, e personanan involucra ta yuda crea un espacio pa reconoce mundialmente cu bestianan salbahe y den cunucu tur ta sernan cu tin pensamento, sentimento y personalidadnan individual. Nan bienestar y e manera cu ta trata nan mester refleha esaki.
Cu e acogida internacional, varios persona rond di mundo ta celebra Dia mundial di Bestia den diferente manera. Sea cu bo haci esaki pa medio di crea un evento pa recauda fondo, haci donacion na organisacionnan cu tin mester di esaki, duna sessionnan educativo, duna bo mascotanan un dia special of te hasta pa medio di adopta un mascota y duna nan un miho bida. Tin un opcion pa tur hende por involucra nan mes den e celebracion asina special aki.
Tin un crisis cu ta birando mas profundo cada biaha rond di mundo cu nos bestianan. Un di e metanan di e celebracion aki ta pa enfatisa cu e proteccion di nos bestianan ta di importancia global. Nos tur tin cu pone un man y yuda uno cu otro compronde y considera e bida compleho di tur bestia y proteha esaki.
Parti di e celebracion di e dia aki, ta pa trece enfoke riba e derecho di bestianan y con pa salbaguardia esaki. Pero pa nos por haci e resto di mundo consciente di esaki, prome nos tin cu compronde kico derechonan di bestia ta nifica realmente.
Kico ta derechonan di bestia?
E derechonan di bestia ta principionan moral cu ta basa riba e conocimento cu bestianan tambe merece e habilidad di bida di e manera cu nan kier, sin cu nan mester ta suheto na e deseonan di ser humano. Den varios pais, e derechonan di ser humano ta pa proteha cierto libertadnan, manera e libertad di expresion of e libertad di tortura, ademas di acceso na democracia. Generalmente, derechonan humano ta salbaguardia e aspectonan basico di loke ta e balor di e bida di un ser humano. Derechonan pa bestia tin e meta di haci algo similar, cu e unico diferencia cu esaki ta pa nos bestianan.
Derechonan di bestia ta den oposiicon directo di explotacion di bestia, cual ta inclui bestianan cu ta ser usa pa ser humano pa un gran variedad di motibo, manera obhetonan pa experimentacion, tortura, peleanan, cuminda, entre otro.
Derechonan di bestia tambe por ser viola ora cu nos ta destrui e habitat natural di e bestianan. Esaki tin un impacto sumamente negativo riba e habilidad di nos bestianan pa cu e manera cu nan ta merece y a ser traha pa biba.
Poco pais a haci oficial e derechonan di bestia y converti esaki den ley, sinembargo paisnan manera Merca of Reino Uni a crea proteccionnan basico y guianan cu tur hende mundialmente por mira y usa como guia di con mester trata bestia.
Cua ta algun di e derechonan di besta?
Mientras cu tiki ley ta existi actualmente cu ta reconoce of proteha bestianan su derecho pa disfruta nan bida liber di interferencia di ser humano, tin algun proteccionnan basico cu por usa como referencia manera por hempel;
No usa bestia pa cuminda
No casa bestia
Proteha e habitat di bestianan pa permiti nan bida nan bida manera cu nan kier
No crusa bestianan, ni cria bestia pa beneficio monetario
Ban nos tur proteha nos bestianan, tanto esun cu nos tin como mascota y esunnan cu tin nos mester rond di mundo.
Feliz Dia Mundial di Bestia na tur e bestianan di Aruba y rond di mundo.
