E pais a biba e dia mas cayente den nan record nacional cu temperatura di 40.9 grado Celsius. Departamento di meteorologia (Bom) a bisa cu e calor ‘extenso’ diamars a surpasa e record anterior di 40.3C di 7 januari 2013. E promedio di temperatura maximo na henter e pais ta medida mas precies di un ola di calor.

E record ta produci ora cu e nacion ta lucha contra un secura grave y crisis di candela forestal. A pronostica cu e calor mas intenso lo yega mas laat den e siman. Esey ta nifica cu por bolbe kibra e record.

Mientras cu centenares di candela a desata, ta critica Prome Minister Scott Morrison pa su respuesta na desaster natural y politica climatico di su gobierno. Australia a bira mas calor e siman aki ora cu un ‘masa di aire cayente’ a yega na e continente.

Meteorologo a pronostica condicion di ola di calor extremo. Riba diamars, centro di e nacion a registra temperatura superior na 45C. Na comienso di siman, Perth, capital di Australia occidental a registra tres dia consecutivo riba 40C, un record pa december.

E calor a yuda pa crea condicion pa desaster natural, manera candela forestal, secura y inundacion, cu semper a tuma luga na Australia, pero awo ta mas frecuente y grave. “E clima di Australia ta cada biaha mas influencia pa keintamento global”, Bom a bisa.

Gobierno conservador di Australia a ricibi critica tanto na nivel nacional como internacional pa locual ta considera un record climatico inadecua. E pais ta un di e mayor emisor di contaminacion di carbon per capita, en gran parti pasobra e pais ta depende gran medida riba energia di carbon.

Nacionnan Uni tambe a bisa cu ta den e minoria di nacion di G20 cu no ta cumpli cu nan promesa pa cu emision. Ola di calor ta e desaster natural mas mortal di e pais y a mata miles mas persona cu inundacion of candela.

E calor, concentra den un siman y mey na januari, a causa morto masivo di bida salvahe, a provoca candela forestal y provoca un aumento den admision na hospital. Tambe a provoca un discusion politico furioso riba e red di energia di e nacion despues cu area di e ciudad a sufri perdida di electricidad meymey di e calor.

Mas di 100 candela ta activo na costa oriental di Australia, cu temperatura halto aumentando condicion peligroso. Autoridad di Bom y bombero ta adverti cu temperatura record a haci candela mas volatil y dificil pa combati.