Riba 1 di mei, mayoria di pais rond mundo ta celebra Dia di Obrero, pa cual nos ta tuma tempo pa aprecia e trabou cu trahadonan ta contribui den e desaroyo di nos sociedad. Na Aruba, esaki ta nifica tambe cu mayoria persona ta haya un dia liber.
E iniciativa pa dedica un dia pa trahadonan y e clase laboral a tuma luga na 1889, unda e Congreso Internacional di Socialistanan Marxista a establece un organisacion nobo yama e Segunda Internacional, como un sucesor pa e Asociacion Internacional di Trahadonan. Nan tabatin e meta pa organisa un demostracion grandi, pa asina por duna apoyo na e clase laboral cu tabata protesta contra e abuso den labor e tempo ey, particularmente pa cu e oranan di trabou.
E dia 1 di mei a wordo adopta na Merca pa e Federacion Mericano pa Labor, unda nan a organisa e prome welga general na Merca dia 1 di mei 1886. Despues di esey, a sigui promove pa “protesta” dia 1 di mei tur aña. Te dia di awe, esaki ainda ta celebra riba e mesun dia of riba e prome dialuna di mei, cu e excepcion di Merca, Canada y Hulanda en particular. E dos pais Norte Americano ta celebra nan Dia di Obrero riba e prome dialuna di september, mientras cu na Hulanda, e dia aki no ta celebra mes.
Na Aruba, nos sa celebra Dia di Obrero tur aña na Mariniers Kazerne. Aunke nos a salta dos aña di celebracion tradicional pa via di e pandemia di coronavirus, e aña aki Mariniers Kazerne na Savaneta ta habri nan porta atrobe pa pueblo di Aruba bin celebra Dia di Obrero den famia. Durante e open dag aki ta bay tin diferente actividad na e sitio pa cual mucha y adulto por disfruta di dje. Tambe ta bay tin varios actividadnan rond Aruba, entre otro weganan di hersengymnastiek, stoelendans y bala cayente, compaña pa musica en bibo na Mi Dushi Casibari cuminsando 6or di anochi. Por registra bo grupo via e Facebook page di Mi Dushi Casibari of tuma contacto na 592 0121.
Di parti Bon Dia Aruba, nos kier desea pueblo di Aruba un dushi Dia di Obrero!
