Diabierna 8 di maart mundo ta celebra Dia Internacional di Hende Muhe. Un dia specialmente dedica na subraya e lucha cu e ser femenino a hiba pa decadas y e logronan social, economico, cultural y politico cu e hende muhe a alcansa.
Tur aña e organisacion UN Women (United Nations Women) ta scoge un tema specifico pa e celebracion di Dia Internacional di Hende Muhe y e aña aki e tema ta “Inverti den hende muhe: acelera e proceso”
UN Women ta remarca cu den un mundo cu ta enfrentando varios crisis cu ta poniendo un presion grandi riba comunidadnan, logra igualdad di genero ta mas vital cu nunca. Sigurando derechonan di muhe y mucha muhe den tur aspecto di bida ta e unico manera pa sigura economianan prospero y husto, y un planeta saludabel pa futuro generacionnan.
E organisacion ta subraya cu un di e desafionan clave pa logra igualdad di genero pa 2030 ta un falta alarmante di financiamento cu ta un deficit anual di 360 biyon dollar na gasto riba medidanan pa igualdad di genero.
UN Women ta presenta cinco area clave cu mester di accion den conhunto pa sigura cu e hende muhe no ta keda atras.
Uno: Inverti den hende muhe ta un cuestion di derecho humano.
Tempo ta core. Igualdad di genero ta keda e reto mas grandi di derecho humano. Inversion den muhe ta un derecho humano imperativo y un pilar pa crea sociedadnan inclusivo. Progreso pa hende muhe ta beneficia un y tur.
Dos: Termina pobresa
E pandemia di COVID, conflictonan geopolitico, desasternan climatico, y confusion economico a pusha un extra 75 miyon do persona den pobresa severo, desde 2020. Esaki por causa mas di 342 miyon muhe y mucha muhe biba bao di e liña di pobresa pa 2030. P’esey e organisacion ta remarca cu accion inmediato ta esencial.
Tres: Implementa financiamento responsivo na genero
Debi na conflictonan y aumento di prijs di combustibel y cuminda, calculacionnan reciente a sugeri cu 75% di paisnan lo limita gasto publico pa 2025. Austeridad t ta impacta negativamente e hende muhe y ta kita espacio di gasto publico riba servicionan publico esencial y proteccion social.
Cuater: Cambia pa un economia berde y sostene un sociedad di cuido
E sistema economico actual ta acelera pobresa, desigualdad y degradacion ambiental, afectando desproporcionalmente e hende muhe y gruponan den exclusion. Defensornan di modelonan economico alternativo ta propone un cambio pa un economia berde y un sociedad di cuido cu ta amplifica e bosnan di hende muhe.
Cinco: Sostene creadornan di cambio feminista
Organisacionnan feminista ta lidera e esfuersonan pa enfrente pobresa y desigualdad di hende muhe. Sinembargo, nan ta trahando cu un suministro limita, ricibiendo un mediocre 0.13% di asistencia oficial di desaroyo.
Dia Internacional di Hende Muhe ta un momento pa refleha riba e progresonan logra, pa pidi cambio, y pa celebra actonan di curashi y determinacion realisa door di muhenan ordinario cu a hunga un papel extraordinario den historia di nan paisnan y comunidadnan.
A pesar cu mundo a logra avancenan sin precedente y extraordinario den e tema di igualdad di genero, ningun pais ainda a logra igualdad di genero den su totalidad.
