Awe 15 di mei ta celebra Dia Internacional di Famia y e aña aki ta celebra e di 30 aniversario di e dia aki. Pa celebra e Dia Internacional di Famia, e aña aki Nacionnan Uni a scoge e tema ‘Famia y Cambio Climatico.’

Famia y Cambio Climatico

Dia Internacional di Famia 2024 tin como meta yama atencion ariba con cambio climatico ta impacta famianan y e rol cu famianan por hunga den accion climatico. Nacionnan Uni ta remarca cu mediante iniciativa di famia y comunidad, por promove accion climatico cu educacion, acceso na informacion, training y participacion di comunidad.

No ta un secreto cu cambio climatico tin un impacto negativo ariba salud y bienestar di famianan pa motibo di aumento di contaminacion, mientras cu eventonan climatico extremo ta ser intensifica pa cambio climatico, manera entre otro horcan, sekia y inundacionnan, frecuentemente ta resulta den e desplasamento forsa y perdida di medionan di bida pa famianan y individuonan.

E tipo di eventonan aki tin un impacto pisa ariba productividad agricola y acceso na awa, intensificando asina e cantidad di famia y personanan cu ta sufri di hamber y cu ta biba den vulnerabilidad. Nan ta causa distorsion economico den e industrianan cu ta hopi sensitivo na impacto di cambio climatico, manera por ehemplo agricultura y pesca.

“Sin accion drastico, adaptacion y mitigacion, e impacto di cambio climatico lo bira cada biaha mas dificil y costoso,” ONU ta resalta.

Kedando na e tema di aña aki, ONU ta subraya e importancia di empodera famianan mediante educacion, cambio di habito di consumo y abogacia, cu ta un parti crucial pa accion climatico significativo y efectivo.

Famianan ta pasa balornan di generacion pa generacion y na mesun momento pasando tambe habitonan sostenibel y consenshi di clima den famianan for di un edad mas jong, cual ta importante.

Integrando principionan di economia circular den educacion di muchanan chikito por yuda construi un modelo economico sostenibel basa riba minimalisa desperdicio y regenera recursonan natural.

Historia Dia Internacional di Famia

Durante e añanan 1980, Nacionnan Uni a cuminsa pone mas atencion ariba e tema di famia. Na 1983, basa riba recomendacion di e Conseho Economico y Social, e Comision pa Desaroyo Social den su resolucion ariba e rol di famia den e proceso di desaroyo a pidi e Secretario General pa aumenta conscientisacion entre esnan cu ta tuma e decisionnan y e publico ariba e problema y necesidad di famia, como tambe e manera efectivo pa cubri e necesidadnan aki.

Den su resolucion di 29 mei 1985, e Conseho a invita e Asamblea General pa considera e posibilidad di inclui den e agenda provisional di su 41 sesion un punto titula “Famianan den e proceso di desaroyo”, cu un bista pa considera un peticion na e Secretario General pa inicia un proceso di desaroyo di conscientisacion global di e tema aki, dirigi na gobierno-, organisacionnan intergubernamental y no-gubernamental y opinion publico.

Despues, basa riba recomendacion di e Comision pa Desaroyo Social, e Asamblea a invita tur Estado miembro pa duna nan opinion riba e posible proclamacion di un aña internacional di famia y pa duna nan comentario- y proposicionnan.

E Conseho tambe a pidi e Secretario General di Nacionnan Uni pa entrega na e Asamblea General un rapport, basa riba e comentario- y proposicionnan di e Estadonan miembro, ariba e posible proclamacion di un tal aña y otro cu ta inclui e maneranan con pa mehora e posicion y bienestar di famia y intensifica e cooperacion internacional como parti di un esfuerso global pa avansa den e progreso social y desaroyo.

Den su resolucion di 9 december 1989, e Asamblea General di Nacionnan Uni a proclama e Aña Internacional di Famia.

Na 1993, e Asamblea General a dicidi den un resolucion cu 15 mei di cada aña mester wordo observa como e Dia Internacional di Famia. Un dia cu ta duna un oportunidad pa promove conscientisacion di e tema relaciona cu famia y pa aumenta e conocemento di e proceso social, economico y demografico cu ta afecta famianan.