20 di november ta un dia importante, riba cual mundo ta conmemora e adopcion di e Declaracion Universal di e Derechonan di Mucha na aña 1959.
Esaki ta e fecha tambe riba cual a aproba e Tratado di Derecho di Mucha na aña 1989. E aña aki ta conmemora e di 30 aniversario cu paisnan a firma e tratado cu e meta pa protege tur mucha na mundo.
Aruba tampoco ta keda atras y aña aki ta celebr’e durante un siman cu un apertura masha bunita y simbolico. Gobierno di Aruba ta invita tur nos muchanan pa e apertura di 15 di november, pa 4:00 di atardi na Centro di Bario Brasil pa conhuntamente haci apertura di e siman den cual nos ta celebra y enfoca riba Derecho di mucha. Den e calendario di actividad por haya mas informacion tocante e eventonan cu lo tuma luga durante siman pa conmemora e dia importante aki.
E Tratado aki ta stipula un cantidad di derecho, cu ta inclui aspectonan di salud, enseñansa, recreacion, como tambe e bida familiar, proteccion contra violencia y discriminacion y cada mucha nan derecho pa nan opinion wordo scucha.
Na aña 2001 Aruba tambe a firma e Tratado aki, haciendo asina e compromiso pa proteha di un forma mas completo posibel e desaroyo di e mucha den su personalidad, talento, capacidad emocional, mental y fisico.
Ta celebra e fecha aki na otro paisnan den forma di actividad, sinembargo ta bon pa tuma e momento aki pa mas bien refleha riba e con leu Aruba ta cu e implementacion di e derechonan di mucha aki na Aruba. Tin varios desaroyonan positivo cu a tuma luga caba, pero ainda tin espacio pa mehoracion. E compromiso t’ey pa sigui cu e ambicion pa tur mucha por realmente gosa di tur nan derechonan.
