Na nivel internacional, 26 di juni ta conmemora e Dia Internacional den e lucha Contra Abuso di Droga y Traficacion Ilicito, despues cu Nacionnan Uni a traves di un resolucion a dicidi celebra e dia aki pa mustra e determinacion di reforsa e actuacion y cooperacion pa logra e obhetivo di un comunidad liber di consumo di droga.

Pa esaki, Fundacion Anti Droga Aruba (FADA) riba dia Internacional di abuso di droga y traficacion ilicito nan ta para keto y duna extra atencion riba un tema asina importante.

E aña aki e lema ta: “Evidencia ta claro, nos mester inverti den prevencion.”

Pa casi 40 aña FADA ta conscientisa comunidad den diferente forma riba e importancia di e topico di uso y abuso di droga.

FADA ta traha den e parti di prevencion unda cu nan ta duna charla na muchanan for di 4 aña pa splica nan kico tur ta e peligernan di uso di substancianan legal of ilegal por trece pa salud di un persona, el a splica cu nan a yega di duna charla te adultonan di 80 aña pa nan por tin tur e informacion necesario.

Pero tur esfuerso aki no ta solamente trabao di FADA sino tambe di otro instancianan cu cada dia ta combati y preveni e uso y traficacion ilicito di droga. Por ehemplo Departamento di Aduana unda nan trabao ta enfoca principalmente riba arma, droga y placa trahando conhuntamente cu e cachonan cu ta den e departamento y hunto cu Cuerpo di Polis y Kustwacht, igualmente nan ta controla pasaheronan cu ta drenta na aeropuerto y barconan crucero.

E situacion di traficacion di droga den e departamento aki ta enfoca riba personanan cu ta purba di mil manera con pa saca of drenta cu substancianan ilicito, pero mayoria di casonan cu nan ta trata di personanan cu ta purba di biaha cu e substancianan.

Cada aña, hendenan di forma individual, comunidadnan y organisacionnan rond mundo ta uni na e celebracion mundial aki di 26 di juni cu tin como obhetivo conscientisa riba e problema grave cu droganan ilicito ta representa pa tur hende.

Organisacion Mundial di Salud ta defini droganan como cualkier substancia psicoactivo, cu un bes cu ta den un organismo viviente, “por modifica su percepcion, estado di animo, cognicion, comportacion of funcion motorico.” Esaki ta inclui alcohol, sigaria y otro substancianan.

Problema mundial di droga ta plantia un reto di varios fase cu ta afecta e bida di miyones di persona na mundo. For di e personanan cu ta sufri trastorno pa consumo di substancianan te comunidadnan cu ta enfrenta e consecuencianan di narcotrafico y delincuencia organisa na otro paisnan; impacto di droganan ta hopi compleho y di un alcance grandi. Pa haci frente na e problema aki ta necesario adopta un enfoke basa den pruebanan cientifico cu lo duna prioridad na prevencion y tratamento.

Di otro banda, tambe ta existi e consumo no medico di trankilisantenan y sedante cu ta afecta di manera desproporcional hende muhe. Ora nan ta consumi droga, e habito aki por causa trastorno den periodo mas corto compara cu caso di hende homber.

Di acuerdo cu e rapport mundial di Droga di aña 2020 elabora pa Oficina di Nacionnan Uni contra Droga y Delito (UNODC) rond di 27 miyon persona na mundo, loke ta coresponde na 0.5% di e poblacion adulto, ta calcula cu a consumi amphetamine, methamphetamine y algun stimulante farmaceutico.

Latino America ta considera como un di e productor maximo di cocaina, marihuana y tabaco rond mundo. No obstante, tin rutanan pa transporta droga den e cinco continente como por ehemplo, for di Bolivia y Peru pa Europa via Africa y Atlantico y for di Colombia pa Merca via Centro America y Caribe.

Den e metanan di Sustainable Development Goals number 3 e cual ta “Garantisa un bida sano y promove bienestar pa tur edadnan,” tin e siguiente obhetivonan:

Fortalece prevencion y tratamento di abuso di substancia adictivo, incluyendo e uso no debido di substancianan y consumo dañino di alcohol.

Fortalece aplicacion di Convenio Marco di Organisacion Mundial di Salud pa Control di Tabaco of Sigaria na tur pais.

Reforsa e capacidad di tur pais, den particular esun den desaroyo, den materia di alerta trempan, reduccion di riesgonan y gestion di riesgo pa salud nacional y mundial.

Na Aruba tin un indicacion cu mas hobennan ta drentando den mundo di adiccion na droga vooral despues di pandemia y pa esey tin instancianan manera Stichting Hunto cu ta enfoca riba con pa reconoce ora un persona cu recientemente a cuminsa haci uso di substancianan, ora ya tin tempo den adiccion y tambe ora ta den etapa di recuperacion.

Durante añanan FADA ta duna charla, tayer, campaña y programa cuminsando for di edad di 4 aña caba. Hunto cu esaki FADA. ta traha di cerca cu hopi otro stakeholders y compania cu ta kere den prevencion pa por sigui brinda conscientisacion.