For di dialuna te diabierna mi wekker ta zona 6or di mainta pa asina mi lanta y prepara pa un dia nobo. Mi ta check tur rednan social mientras mi ta traha mi koffie y e pancakes pa mi yiu muhe di casi cinco aña.

Band’i 7or y mey mi ta sali pa asina hiba mi yiu na su scol mientras mi ta scucha na radio e noticianan di mainta. Ora bo ta un periodista, bo mester ta actualisa di e noticia y comentarionan di tur banda.

Den transcurso di mainta mi ta dedica mi tempo pa skirbi articulonan cu tin relacion cu Latino America y e noticianan mas destaca di e region ey. Den algun ocasion tambe tin cu asisti na conferencianan di prensa pa asina por traha riba e item pa e corant di e dia despues.

Parti merdia mi ta busca mi yiu na su scol, prepara cuminda pa asina hunto cu mi casa y mi yiu nos sinta y come, pa despues mi bay back dilanti computer y sigui traha.

Atardi ta e tempo mas importante y ta wordo dedica pa skirbi y produci articulonan, check riba rednan social si tin algun item cu tin mas relevancia y tambe yama diferente personanan envolvi den e noticia, como tambe politico y miembronan di gobierno.

Ora trabao di e dia ta caba, cu por ta den oranan di atardi of anochi, ta yega e momento pa mi dedica na mi famia y mi mes.

E tempo di un periodista semper ta cortico, tin biaha cu mester entrega un articulo den cuestion di oranan pa motibo cu ta un tema hopi importante cu mester wordo publica mesora. Despues di skirbi e articulo, e hefe di redaccion tin e deber di revisa cu tur cos ta bon skirbi y redacta, pa asina ey por wordo publica riba rednan social y pa tambe sali den e corant den edicion di e dia siguiente.

Comenta y informa riba loke ta pasa rond di e isla ta fundamental como periodista. Mester tin respet pa berdad, meter persigui e obhetividad – aunke algun biaha esey no ta accesibel – y ademas mester diferencia loke ta trata informacion y loke ta opinion, pa motibo cu un periodista semper mester ta critico.

E ta un trabao basa riba balornan como empatia, bondad, respet y sinceridad cu tur hende, aunke semper ta existi criticanan di banda y banda. Eherce e profesion di periodista no ta un trabao senciyo y tampoco no tur hende cu tin un camara y sali riba caya sa kico e trabao aki ta encera. No ta suficiente papia y informa riba un suceso, sino tambe mester tin conocemento riba leynan, etica, profesionalismo.

Riba potret: reportero Andreina Morillo di Bon Dia Aruba.