Ayera SKOA, un fundacion encarga cu 46 scol Catolico, a organisa nan Dia di Reflexion di forma virtual.

Tur aña nan ta tuma un dia generalmente casi na final di aña pa alrededor 740 trahado cu ta cay den SKOA, caminda di un forma virtual nan a sigui di cerca e Dia di Reflexion bou e tema: “Enseñansa ta cuminsa den nos curason construyendo catedral.”. Obispo di e diocesis di Willemstand, Monseñor Luis Secco a dna su mensahe pa tur trahadonan di SKOA.

Nan a cuminsa mainta tempran cu un Santo Sacrificio di Misa na Parokia Inmaculada Concepcion celebra pa pastoor Jairo, y transmiti via Facebook-page di e misa aki.

Despues na sede di SIMAR y cu presencia di staff di SKOA, Pastoor Wuilder hunto cu su team di IKD-Aruba ta bin cu un mensahe caminda nan ta bay reflexiona kico e aña aki tabata pa nan. Nan a haci riba plataforma Googel Meet caminda cada scol a prepara sea un bon mensahe.

E religioso haciendo uzo di algun video a pone personal di SKOA reflexiona. Cu e videonan aki pastoor Wuilder a ilustra cu cada un di nos mester di otro. Vooral si e muchanan mester di atencion y proteccion di e hendenan adulto. Pero tambe ta un realidad pa cada un di nos explora nos paden.

“Kico mi tin den mi ser. Mi legria y tristesa.” E ta haya cu esaki ta un realidad cu nos ta mira den nos muchanan. Pues e ta haya cu si nos mes no ta bin cu e pregunta di reflexion aki, con nos por haci’e cerca nos muchanan. Cu nos no sa si den nan cas, nan a mand’e scol sin cuminda mes, pasobra nan no tin placa. “Pasobra Covid a kita nan mayor for di trabao,” el a bisa.

Reflexion

Directora di SKOA, Anuska Baly a declara na Bon Dia Aruba cu full e mainta di ayera nan a dedica pa reflexiona riba con bendiciona cada un tabata ta. “Sea cu nos a sobrevivi Covid. Nos tabatin basta docente cu a wordo infecta. Sea nos no a haye, kiermen nos ta bendiciona,” el a bisa.

Segun Sra. Baly e bendicion mas grandi ta esun di por tin unn trabao, ya cu hopi lamentablemente no tin’e. Un reflexion cu el a trece dilanti ta cu hopi no tin un trabao cu por genera un entrada pa nan por gosa di e luna festivo aki. E ta reconoce cu luna di december 2020 ta ainda un luna dificil, pero cu ta invita nos tur pa reflexiona y pensa con bendiciona bo ta.

Pero fundamentalmente con agradecido nos mester ta cu nos tin salud. Nos por ta hunto cu nos famia y nos tabatin un dak riba nos cabes y cumimda riba mesa. “Pasobra hopi no tabatin of no tin esey ainda.” Pues e ta haya cu e reflexion ta hopi. Un di nan ta cu cosnan no ta bon facil.

“Covid a trece cos bon, pero el a trece cosnan menos bon,” el a bisa. E cos bon cu e pandemia aki a trece ta esun di siña aprecia kico tur nos tin.

Cu e Dia di Reflexion aki, SKOA ta cera 2020. Nan ta habri bek dia 6 di januari 2021.