Stichting Rancho a firma un memorandum di entendimento (MoU) cu e compania Cornerstone Economics, pa realisa e proyecto educacional di inclusion social Rancho, CRECE.
E acto di forma aki a wordo realisa diasabra ultimo, den cuadro di e fundacion aki su 9 aña di existencia. Presidente di e fundacion, Clifford Rosa, a laga sa cu dia 20 di april, nan directiva a proclama e fecha aki anualmente como Dia di Rancho. Nan ta cuminsa traha riba e preparacion di nan prome decada di existencia, pa sigui conserva historia y cultura di e bario aki.
Igualmente, el a laga sa cu e fundacion ta contento riba e rumbo y desaroyo cu nan ta bayendo. Un fase cu nan ta bay cuminsa awor tin di haber cu e desaroyo economico di Rancho. P’esey nan a firma un MoU cu e compania Cornerstone Economics, pa duna contenido pa e proyecto aki, ya cu e trabou cu e fundacion ta bin haciendo mester di sosten financiero. E compania aki a presenta e fundacion un proyecto cu ta duna nan un bista diferente den e desaroyo economico di Rancho.
Directora di Cornerstone Economics, Lay Hing de Kort-Yee, a declara na e matutino aki, cu nan ta un compania di conseho, cu nan enfoke ta e parti financiero y economico. Den cuadro di e MoU firma cu Stichting Rancho, nan lo duna educacion financiero y empresarial pa e habitantenan di Rancho. E ta yuda desaroya e habitantenan di e bario historico aki, y tambe desaroya e parti economico di Rancho.
Nan a yega di realisa un rapport caba, pero awor nan kier bin cu un estudio mas profundo cu e fundacion, pa bay mas den historia di e bario y traha algo cu ta pas cu e mision y vision di e fundacion. E lo ta un programa di un aña, unda nan lo trece educacion empresarial specialmente pa e hobennan di e comunidad di Rancho.
Mañan nan lo tin un mini conferencia, unda fundacion Rancho lo presenta dos comision. Un di nan tin di haber cu e parti maritimo, y e di dos comision cu e parti aereo. E dos comisionnan aki lo percura pa bin cu un programa di educacion riba nan topiconan pa e comunidad di Rancho tambe.
