(AP) – Bombardeonan Israeli a mata mas cu 270 Libanes ayera dialuna den e dia mas mortal pa Libanon for di e guera di 2006 entre Israel y Hezbollah, mientras cu e ehercito Israeli a adverti hendenan den sur y ost di e pais pa evacua prome cu un campaña aereo mas amplio contra e grupo politico-militar.
Miles di libanes a hui for di sur y e caminda principal pafo di Sidon tabata yena cu autonan cu tabata bay Beirut den e exodo di mas grandi for di e bringamentonan di 2006. Mas cu 1.000 hende a keda herida den e atakenan, un cifra doloroso pa un pais cu apenas ta recuperando di un operacion siman pasa den cual centenares di aparato electronico a explota.
E cantidad di morto te hasta a surpasa esun di e explosion di waf di Beirut na 2020, ora cu centenares di ton di nitrato di amonio a explota, matando por lo menos 218 hende y heridando mas cu 6.000.
Den un video dirigi na civilnan Libanes, prome minister di Israel Benjamin Netanyahu a pidi nan pa haci caso di e yamadanan di Israel pa evacua, bisando: “Tuma e advertencia aki na serio.”
“Por fabor sali for di e zona di peliger awor mes,” Netanyahu a declara. “Un bes cu nos operacion ta cla, nan lo por regresa nan cas sano y salvo.”
Ehercito Israeli a bisa dialuna atardi cu nan a realisa un atake dirigi na Beirut. E no a duna detaye.
Agencia di noticia estatal Libanes a informa cu tres misil a cay den e bario di Beir al-Abed den sur di Beirut. E canal di television di Hezbollah, Al-Manar TV, a bisa cu seis persona a resulta herida. Polis a cera e area y a prohibi periodistanan di drenta.
Minister di Salubridad di Libanon, Firass Abiad, a bisa den un conferencia di prensa na Beirut cu atakenan aereo anterior a dal hospitalnan, centronan medico y ambulance. Gobierno a ordena pa cera scolnan y universidadnan den mayoria di e pais y a cuminsa prepara refugio pa hendenan desplasa for di sur.
Ehercito israeli a bisa cu el a dal alrededor di 800 instalacion, bisando cu a dirigi riba arsenalnan di Hezbollah. Algun bombardeo a dal pueblonan den sur y e valle di Beka den oost. Un a dal Byblos, den centro di Libanon, nort di Beirut y mas cu 128 kilometer for di e frontera. El a agrega cu e tabata amplia e alcance di e bombardeo pa cubri areanan di e valle banda di e frontera oriental di Libanon cu Siria. Hezbollah pa hopi tempo a mantene un presencia den e valle, unda e grupo a ser funda na 1982 cu ayudo di e Guardia Revolucionario Irani.
Hefe militar Israeli, teniente general Herzi Halevi, a bisa cu Israel tabata preparando su “siguiente fasenan” di operacionnan contra Hezbollah, y cu su atakenan aereo ta “proactivo,” dirigi riba e instalacionnan di e grupo cu a ser lanta durante e ultimo 20 aña.
