Director di Archivo Nacional Aruba (ANA) Raymond Hernandez hunto cu Edrick Croes di Fundacion Amigonan di Archivo a anuncia cu dia 27 di september proximo nan lo organisa un dia di informacion riba e tema di digitalisacion y e retonan cu esaki ta trece cune.

E invitacion ta bay pa comunidad di Aruba en general y particularmente esunnan cu ta traha cu maneho, legislacion, documentacion, informacion, ICT y digitalisacion pa atende e dia di informacion aki. E dia di informacion ta tuma luga na Renaissance Convention Center di 8.00 a.m. pa 4.30 p.m. E tin un contribucion monetario pa persona. Incluso e evento ta inclui un lunch y final di atardi lo tin un momento pa haci contacto cu otro.

Meta.
Segun Croes e dia di informacion aki ta wordo teni den cuadro di “International Day for Universal Access to Information Day cu ta wordo conmemora dia 28 di september y proclama pa UNESCO. E meta tras di e evento aki ta bin cu un dia di reflexion pa analisa kico por haci pa e futuro di digitalisacion na Aruba. Mas tanto riba e futuro con nos ta bay anda cu documentonan digital cu ta wordo crea na e momento aki y con nos ta warda nan pa e futuro generacion.

Pa Director di ANA e preocupacion cu nan tin cu e proceso di digitalisacion cu ta tumando luga globalmente y cu niun hende por detene ta otro. Hernandez a bisa cu nan preocupacion como ‘guardian’ di nos historia manera e archivistanan ta wordo cualifica, ta esun di wak con nan por garantisa cu e informacion digital aki ta wordo warda pa futuro. Pero importante ta pa nan kere den informacion cu a wordo produci shen aña prome.

Tin estudionan cu ta tumando luga na Hulanda riba e aspecto aki y varios di e oradonan cu lo bini di Hulanda lo aborda e tema aki. ANA mes ta spera no solamente di por saca informacion valioso sino cu nan por yega na comprondemento cu e expertonan pa duna nos e sosten necesario pa sigui cu e nivel di trabou aki.

 

E dia aki ta particularmente relevante cu e agenda nobo di 2030 di e Agenda di Desaroyo, cu ta e “Sustainable Development Goal (SDG)” target 16.10, cual ta pa sigura cu e publico tin acceso na informacion y proteccion di e libertad fundamental di por haya informacion.

E meta principal di e dia di informacion aki ta pa mustra riba e impacto cu digitalisacion tin riba e formacion di documentacion digital, particularmente pa loke ta trata nos herencia cultural y historia. Durante e dia aki nan lo kier enfoca riba e reto, opcionnan y posibel solucion cu digitalisacion tin pa esunnan cu ta produci informacion den forma digital, y asina garantisa e conservacion di informacion, den un forma digital sostenibel y duradero.

Participantenan.
E dia ey lo tin 4 orador: Drs. Marens L. Engelhard, Migiza Victoriashoop Msc, Drs. Paul Geerders y . Eric Kokke. Banda di e oradornan di Hulanda, lo tin oradornan di Aruba cu tambe lo mustra e situacion den nos isla. E orador principal di Aruba ta e mesun director di Archivo Nacional Aruba.

Tambe lo tin instancianan local cu lo presenta con un sistema digital a wordo implementa den nan organisacion: Aruba Airport Authority, cu Shensly Tromp, IT Director. Su presentacion lo ta tocante“Happy Flow @ Aruba Airport”. Di Aruba Bank tin Arthur Frans riba Innovation and Information Technology Manager y Nigel Wix, IT Innovation Architect, cu lo presenta tocante e “Digitalisacion den banco”. Pa ITP Caribbean International, nos tin Paula Zijlstra, cu ta e Helpdesk/Projectmedewerker y lo duna un presentacion di “Promedico Aruba.” E idioma di e presentacionnan ta na Hulandes y na Ingles.

Hernandez a laga sa cu pa mas informacion di registracion y of di e evento por tuma contacto cu Fundacion Amigonan di Archivo na telefon: 567-4118 of e-mail: fundacion.ada@gmail.com.