Un biaha mas Stichting Rancho den pro di conservacion di herencia cultural, e aña aki ta organisando e 14 edicion di careda pa boto miniatura cu lo tuma luga dialuna 18 di maart for di 9or di mainta na Governor’s Bay Beach.

Clifford Rosa presidente di Stichting Rancho a sigura na redactor di Bon Dia Aruba cu tradicion di careda di boto ta bay continua e aña aki cu e organisacion di e evento caminda nan kier encurasha mas hende cu tin nan boto warda pa pone nan riba lama.

“Bin cu bo famia, bin cu bo yiunan of nietonan pa asina aki e tradicion no por muri, mirando cu esaki ta un tradicion casi unico na e islanan y como isleño e ta algo cu ta hopi bon pa tin e conocemento di e tradicion di coremento di boto miniatura pero tambe di botonan mas grandi, esey ta e idea tambe pa nos por traspasa e conocemento y e dia aki nos ta organisa esaki un biaha mas pa nos conserva un parti di nos herencia cultural inmaterial di Rancho,” Rosa a sigura.

Nan ta spera di tin por lo menos 12 capitan, e punto ta cu cada un di nan mester paga e suma di 25 florin y cu esey por registra 3 boto, un boto pa categoria 30, un pa categoria 35 y otro pa categoria 40, ademas e ganadonan di cada categoria lo haya premio.

Esaki ta e contribucion manera Rosa ta menciona pa motibo cu tin gastonan di operacion “cu pa hopi biaha hende no ta pensa riba esey, pero a nos Stichting Rancho semper ta haci nos esfuerso pa bin cu e careda aki y nos ta invita pueblo pa bin y encurasha mas capitan pa por participa y traspasa e conocemento pa muchanan y nos mantene e tradicion aki,” el a bisa.

Esaki ta e 14 edicion di competencia di boto miniatura pero Rosa expresa cu su persona tin mas tempo cu loke ta trata boto miniatura, Stichting Rancho a pone e boto miniatura como un parti di nan herencia cultura inmaterial di Rancho cu e proposito di educa e generacionnan cu ta bin cu e conexion di lama, di biba riba un isla y con por yega di un isla pa otro usando bela.

Sinembargo, Rosa a trece dilanti cu cada aña e organisacion pa e actividad aki ta bira mas complica, “si ta un evento cu bo ta haci manera un Beach Tennis of un Regatta, cu bo ta bisa cu bo ta bay genera hopi fondo, bo ta bisa cu tin cu cumpli cu e reglanan sigur pa siguridad, a nos como fundacion semper ta percura pa siguridad di participantenan, aworaki ta dificil pa haci un evento riba beach mirando e vergunning cu tin cu paga, tur esey ta pone cu e gana di haci e evento cu ta pa conserva nos cultura, ta bira un tiki dificil.” El a finalisa.