E firmamento di e acuerdo finalmente ta tras di lomba, awor nos tin e compromiso pa bay ehecuta. A pesar di e palabranan di tanto secretario di estado Knops como di nos Promer Ministro, nos a keda cu un sentimento di duda.

No pa loke ta e bon intencionnan di ambos banda, pero si pa e cumplimento cu mester sigui awor. Basicamente por a firma e acuerdo aki varios luna pasa caba, pero e motibo cu no a firma tur e tempo ey tabata pasobra den e partidonan cu ta apoya e gobierno di coalicion aki, tabata reina e pensamento cu por a logra cambia varios cos den e acuerdo manera Hulanda a formula esaki na promer instante. Esey no tabata e caso, practicamente esaki ta e mesun acuerdo di tanto luna pasa. Por ta cu den e textonan cu nos no a mira ainda, esun di e dos proyectonan di ley cu por cuminza nan trayecto di conseho formal cerca Raad van State, por tin cambio, aunke dificilmente cambio fundamental.

For di expresion di nos Promer Ministro na varios momento nos ta comprende cu a logra un mencion explicito di respet pa poder autonomo di organonan local manera gobierno y parlamento, den e ley di Reino oncerniente e organo di reforma. Si esey ta e caso ainda e ta solamente un asunto bastante relativo y den practica di implementacion esey lo keda demostra tambe: e poder di imposicion no mester di cana e caminda di usurpa poder di decision di parlamento, pero ta bin di poder di e recursonan financiero, hinca den un ley di Reino. Aki mester bisa cu Hulanda a siña un les. Nos por corda cu aña pasa un par di politico, cu awor atrobe lo mester dicidi si nan ta duna nan sosten na e proyecto aki, a kere cu nan por a masacra un supervision di Reino cu eroneamente tabata hinca den un ley local. Esey a haci cu Hulanda, despues di e experiencia negativo ey, no tabatin gana mas den un repiticion di e indole ey. Pesey a mantene e posicion cu absolutamente no ta hinca nada mas den ley local.

Esey ta haci tambe cu e sugerencia di banda di e partido den oposicion, cu por a hinca e organo di reforma tambe den un ley local, refiriendo aki na similitud cu e ley di supervision cu a institui na 2015, tabata un opcion cu a muri caba promer cu el a nace. E hecho cu e dos asuntonan aki ta den un ley di Reino tin como consecuencia cu nan ta fuera di alcance di cualkier politico local y ta ey nan mester ta tambe, pasobra ora nos ta papia di tanto cambio, cu ta un menaza directo pa e forma tradicional di maneha politica na Aruba, tur cos dentro di nan poder ta core riesgo grandi di keda sabotea. Esey ta loke nos a mira den practicamente tur intento di reforma positivo den e añanan nos tras. Knops por cierto a referi textualmente na esaki den su discurso y a enfatisa cu awor si ta e idea cu mester logra. Y pa bon di Aruba mes, nos mester logra. Y pa nos logra cos no por keda pega, manera tanto biaha nos a mira caba, den pasa e leynan necesario y despues… nada. Nos tin henter un historia nos tras di introduci cosnan basicamente despues di ‘mahamento’ Hulandes, pero no pasobra nos tabata kere cu esey lo tabata lo corecto pa haci. No ta pornada tambe cu varios ley, manera esun di supervision riba financiamento di partido politico y di Ombudsman, te recientemente no a ni logra pasa parlamento. Awor, no solamente nan a pasa, pero mester haya implementacion tambe, pasobra e proximo añanan nos ta bao di un supervision general. Y ya cu nos ta papiando di implementacion, mester percura pa esaki tuma lugar na e manera corecto, pa nan no bira instrumento pa continua e patronahe politico cu tin e sociedad aki venena. Nos por corda con e insistencia di Hulanda cu nos mester a pone empresanan estatal ‘na distancia’ di e mandatario di turno, loke berdad a sucede y tabatin como consecuencia cu e empresanan aki a bira tremendo ‘parking lot’ pa pone mas hende cu ta liga na e partido(nan) na mando. E desastre ey no a caba ainda, te dia di awe nepotismo y faboritismo politico den e empresanan aki ta un realidad grandi, a pesar di e anuncio di introduccion di un Corporate Governance Code, cu te awe ningun hende a haya pa mira, te pa nos mira algun efecto positvo den e nombramentonan reciente, al contrario. Hasta ultimamente nos por mira e ultimo variante di nepotismo, esey ta e invento di pone ‘abogado di confianza’ na cabez di emprendimento cu aparentemente no tin hende drechi mas na Aruba pa pone e cosnan aki den nan man. Cu esaki por crea balente conflicto di interes ora e abogado mester bay atende otro asunto legal pa gobierno, te awor no ta parce un consideracion di peso…

En todo caso, desde ayera Aruba tin algo di celebra, aunke di forma modera. Nos por tin un futuro mas sigur, pasobra banda di Arubano, nos ta ciudadano Hulandes, loke porfin ta traha na nos fabor.