Cu e sancionnan Mericano di januari 2019 y e otronan di e siman aki, e pregunta por surgi ta con Venezuela ta sigui funciona, awor cu practicamente e pais no por produci gasolin pa su economia opera. E siguiente articulo di Financial Times ta duna un analisis di con e empresa Ruso Rosneft tin un ‘lifeline’ habri pa regimen di Maduro.

E compania petrolero estatal Ruso Rosneft a keda converti den e ultimo gran proveedor di gasolin na Venezuela, apoyando e regimen di presidente Nicolas Maduro, segun cu Estadonan Uni ta intensifica presion economico riba Caracas, asina personanan conoci cu e acuerdonan di envio ta relata.

E salbabida pa e regimen a duna Moscu un influencia sin precedente riba e pais afecta pa e crisis, frustrando e esfuersonan di Washington y Union Europeo pa saca e presidente socialista di poder y habri paso pa e lider opositor Juan Guaido.

E datonan mira pa Financial Times ta mustra cu Rosneft a suministra e importacion completo di gasolin di Venezuela na juni, ya cu e otro proveedornan a retira.

Ocho carga di gasolin pa un total di 1,7 miyon bari, organisa pa Rosneft Trading, e brasa comercial di e compania cu sede na Ginebra, a keda carga den transbordo ‘di barco pa barco’ riba alta mar cerca di Malta, Gibraltar y Aruba, segun e documentonan.

Despues, e tankeronan a bay na e puertonan Venezolano, unda a entrega e gasolin na Pdvsa, e compania petrolero estatal di Venezuela. E señalnan di satelite disponibel pa publico, recopila pa e compania di analisis di petroleo Vortexa, a confirma e realisacion di e entreganan.

No a keda cla si e companianan cu ta suministra e carganan na Rosneft, algun di nan ta na puertonan na Hulanda, como tambe Grecia y Turkia, tabata sa cu nan tabata destina pa Venezuela, prome cu a haci transbordo riba lama.

“E suministro di gasolin di Venezuela ta depende di Rusia,” un persona conoci cu e acuerdo di suministro, a bisa. “E dia cu Rusia stop di suministra gasolin, Venezuela ta dal para.”

Otro persona cu conocemento di e envionan a bisa cu nan tabata “un operacion puramente comercial” basa riba “contractonan previamente acorda”.

Si no tin indicacion cu Rosneft a viola e sancionnan di Estadonan Uni contra Venezuela (e medidanan ta aplicabel contra individuo y empresa Mericano) e acuerdo di suministro ta converti Rosneft y Kremlin den un di e obstaculonan mas grandi pa e plannan Mericano pa forsa un cambio di regimen na Caracas.

Washington y Union Europeo a reconoce Guaidó, e presidente di Asamblea Nacional, como lider interino legitimo di Venezuela, en espera di eleccion liber.

Gobierno di Trump a impone sancion economico contra Venezuela, incluyendo un prohibicion total pa ciudadano, empresa o banco Mericano cu ta traha cu Pdvsa, cu a drenta na vigor na april di e aña aki. Dialuna pasa, Washington a aumenta mas ainda e presion riba Caracas, anunciando un embargo economico casi total pa e pais, cu ta posee e reservanan mas grandi di petroleo na mundo.

Venezuela tabata refina su propio gasolin, pero añanan largo di negligencia y inversion demasiado abao, como tambe e caida di produccion interno di crudo, a haci cu e pais ta depende awor di importacion.

Awor tin escasez di suministro y rijnan largo na e stacionnan di combustibel den gran parti di e pais a bira un bista normal. E 1,7 miyon bari suministra pa Rosneft Trading na juni ta coresponde cu un suministro di aproximadamente 56.000 bari pa dia, o aproximadamente un cuarta parti di e consumo di gasolin di Venezuela di dos aña pasa.

Na januari, prome cu e imposicion di sancion Mericano riba Pdvsa, Venezuela tabata cumprando gasolin na un variedad di proveedor stranhero, incluso e empresa Spaño Repsol, segun e datonan ta mustra. Repsol a confirma cu e compania a stop di entrega gasolin na Venezuela.

E principal fuente di entrada di Caracas a keda afecta ya cu su produccion di petroleo crudo a cay bruscamente. Mientras tanto, e comerciantenan internacional a bira cada biaha mas cauteloso cu suministra e pais combustibel refina cu e mester, segun cu e sancionnan Mericano tabata bira mas fuerte. E crisis Venezolano a yega na un punto morto principalmente pasobra e regimen autoritario a ricibi apoyo financiero y material di Rusia, China y Cuba.

Segun legislacion di sancion di Estadonan Uni, Washington por, segun su discrecion, castiga cualkier entidad, incluso pafo di su teritorio, cu e ta considera cu ta dunando apoyo sustancial na Pdvsa.

Un funcionario halto di gobierno di Estadonan Uni a bisa Financial Times cu comercio continuo di Rosneft cu Pdvsa a pone e compania Ruso como un potencial obhetivo pa sancion “na multiple ocasion” , pero gobierno di Trump a abstene di golpia e compania te awor, pa temor di un ramificacion mas amplio.

Estadonan Uni ya a impone algun sancion riba Rosneft na 2014 pa participacion di Rusia na e crisis di Ucrania, pero a duna e compania suficiente libertad pa continua cu comercio, incluyendo e capacidad di accede na financiamento a corto plaso.

E compania cu sede na Moscu ta produci casi 5 miyon bari pa dia di crudo y otro likido, o aproximadamente 5 porciento di e suministro mundial, y cualkier interupcion den su produccion por conduci na un fuerte aumento den prijs di petroleo.

Desde 2014, Rosneft a proporciona mas di US$ 7.000 miyon na gobierno di Maduro, principalmente den forma di prepago pa entrega di crudo, y a inverti den varios campo di petroleo y gas na e pais.

Igor Sechin, director ehecutivo di Rosneft, ta un di e ayudantenan mas cerca y di mayor servicio di presidente Vladimir Putin y ta ser mira como un di e lidernan di e faccion di linea duro di Kremlin, estrechamente asocia cu su servicio di siguridad. E ta bao di sancion personal di Merca actualmente y a realisa varios bishita na Venezuela pa negocia cu gobierno di Maduro.

Kremlin tambe a apoya Caracas directamente cu lineanan di credito, acuerdo di defensa y asesoria militar, y un prestamo soberano di US$ 3.150 miyon cu Moscu a acorda pa restructura na 2017.

Rosneft a nenga di duna comentario. Departamento di Tesoro di Estadonan Uni, cu tin e responsabilidad pa e sancionnan, a nenga di comenta encuanto e transaccionnan di Rosneft. Pdvsa tambe a nenga di duna comentario.