Dia 8 di april venidero Secretario di Estado pa Relacionnan den Reino y Digitalisacion, Zsolt Szabó, lo ta bishitando Aruba/ Durante e bishita aki e Secretario di Estado lo ser conoci cu Gabinete AVP-FUTURO, cu a huramenta diabierna ultimo.
Segun e noticiero local Noticia Cla a reporta, durante e bishita aki e Secretario di Estado lo ser conoci cu Gabinete AVP-FUTURO oficialmente como gobierno, ya cu anteriormente, dia 12 di augustus 2024, el a ser conoci caba cu e prome minister nobo, Mike Eman, pero e momento ey como miembro di oposicion y lider di fraccion AVP.
Esaki lo ta bira un bishita interesante teniendo na cuenta algun aspecto di gran importancia cu tin riba mesa, entre otro e acuerdo pa un Rijkswet nobo cu tin e deadline di 1 di mei. Segun e portal e indica, esaki lo bira e prome “test” pa Gabinete AVP-FUTURO tocante kico tanto Aruba, como Hulanda por spera di e relacion cu e gabinete nobo.
Manera ta conoci e partnernan den coalicion tin pensamentonan diferente pa loke ta trata e Rijkswet. AVP na mas di un ocasion a vocifera cu nan ta contra e Rijkswet y cu lo desea di cambia esaki, ademas di cambia e debe di covid tambe den un fondo di inversion.
Di otro banda, e otro partner den coalicion partido FUTURO tambe a expresa na varios ocasion cu nan ta na fabor di un Rijkswet y no ta mira necesidad pa cambia e ley y ta sigura cu e ta bon manera e ta aworaki.
Esaki ta un punto interesante pa mira con ta desaroya, specialmente durante e bishita di e Secretario di Estado, caminda un punto cu probablemente lo ta riba mesa ta e fecha di dia 1 di mei. Riba esaki, e Secretario di Estado Szabó ya caba a indica cu no ta bay cambia e fecha di 1 di mei.
Den nan funcion di formador, Eman, como Croes a indica cu nan tabata pendiente y monitoreando henter e proceso pa loke ta e acuerdo di Rijkswet y cumplimento cu e fecha di 1 di mei,y segun e portal local a indica Eman a expresa cu e no ta kere cu lo tin un problema pa cumpli cu e fecha aki. Ademas, segun e noticiero, Hulanda no ta interesa den e idea di cambia e debe di covid den un fondo di inversion y kier pa Aruba mantene su mes na e palabracionnan haci.
Manera ta conoci dia 4 di juni 2024 Gabinete Wever-Croes II a yega na un acuerdo nobo cu Hulanda, un acuerdo caminda e RAft ta ser elimina, dunando espacio pa sigui negocia riba otro tipo di Rijkswet, un solucion hibrido caminda ta bin un Rijkswet cu ta duna e cuadro, e definicionnan, pero e numbernan, numeriek ta den landsverorodening di Aruba caminda Parlamento di Aruba ta dicidi e normanan.
Otro punto cu a palabra den e acuerdo aki ta cu e debenan cu Aruba tin di prome cu COVID, Hulanda ta dispuesto pa refinancia esey tambe na un interes mas abou. Ademas nan a palabra tambe cu ta bay cambia e normanan financiero di pais Aruba pasobra e normanan cu ta den e LAft aworaki ta tipico di un pais cu ta den deficit, pero awo Aruba ta un pais cu ta presenta un presupuesto cu surplus y e normanan ey no ta aplicable mas y ta hasta stroba desaroyo.
Hulanda a bay di acuerdo pa Aruba revisa su normanan y pa evita discusion a pidi pa laga IMF haci esaki.
A palabra tambe den e acuerdo di juni aña pasa cu pa dia 1 di mei mester entrega e ley di Rijkswet nobo na Tweede Kamer y na Parlamento di Aruba.
Un otro aspecto cu ta haci e bishita di Secretario di Estado Szabó interesante ta cu pa prome biaha, den un gabinete, tin un Ministerio di Relacionnan di Reino. Manera e noticiero local Noticia Cla ta señala, ta custumber cu e prome minister ta esun cu ta encarga cu atende asuntonan cu Hulanda. Pero den Gabinete AVP-FUTURO e ministerio nobo aki ta cay bou di vice prome minister Gerlien Croes, un cartera cu e mandatario tabata firme pa e maneha.
Den luna di augustus aña pasa e Secretario di Estado a realisa su prome bishita di trabou oficial pa Aruba, despues di asumi su responsabilidad como Secretario di Estado pa Relacionnan di Reino y Digitalisacion bou di e Gabinete Schoof I.
Durante e bishita aki, ademas di ser conoci cu Gobernador di Aruba SE Alfonso Boekhoudt, mandatario y parlamentarionan, el a bishita y Archivo Nacional Aruba, a realisa un recorido den San Nicolas y tabatin un encuentro cu representantenan di sector empresarial. Ademas el a haya un presentacion di progreso di e Landspakket, durante cual a enfoca riba dos area di e Landspakket.
Un ta esun di finanzas, unda ex minister di Finanzas, Xiomara Maduro y su ekipo a splica di tur e trabou cu ta haciendo riba e tereno aki y tambe riba loke ta haciendo pa fortifica e control di e maneho financiero di pais Aruba. E di dos area di e Landspakket cu a enfoca riba dje ta esun di e situacion laboral di Aruba, unda e Secretario di Estado a haya informacion entre otro riba tema di trahadonan indocumenta, tambe kico Aruba ta haciendo pa flexibilisa e mercado laboral y cua ta e garantianan cu tin pa duna un trahado ora e perde trabou.
