Dia 7 di december ultimo tabata Dia Internacional di Aviacion Civil. Minister di Transporte, Comunicacion y Sector Primario, Chris Romero, ta extende su palabranan di felicitacion na tur e profesionalnan laborando den e industria importante di aviacion.
E bon trabou di e profesionalnan den e mundo di aviacion ta sumamente importante, cargando asina Aruba su Sector di Turismo di cual nos economia ta depende asina hopi.
“Nos ta reconoce e rol importante di Directie Luchtvaart den e mundo di aviacion, conhuntamente cu stakeholders principal manera AAA NV, ANSA NV, Departamento Meterologico di Aruba y tur aerolinea, compania di ground handling, compania di mantenemento y tur demas stakeholders”, tabata palabranan di Romero, kende a expresa asina su gratitud na tur esunnan cu ta haci posibel pa e trabou den aviacion keda haci optimalmente, den un comunicado di prensa.
Tambe Romero a duna di conoce cu ‘e aña aki e Organisacion Internacional di Aviacion Civil (ICAO) ta celebra su di 75 aña di existencia y kier pone enfasis riba, y tambe aumenta, e cantidad di hende muhe laborando den e mundo di aviacion. Den cuadro di esey, un pabien special ta bay na tur e profesionalnan femenino den e mundo di aviacion, pa cual nos tin hopi aprecio pa e dedicacion y e trabounan profesional cu boso ta desplega’.
Romero a haci un apelacion pa inspira tur mucha na scol (y principalmente mucha muhe) pa considera un carera den e mundo di aviacion, cu antes tabata tipico un industria pa hende homber y awor no mas. Ta proyecta un crecemento di e sector di aviacion y ta bay tin necesidad di profesionalnan bon prepara, segun e comunicado ta finalisa.
