Dia 5 di juni ta yega Aruba e prome barco cu producto di Venezuela

Despues di cuater aña sin actividad debi na ceramento di frontera, dialuna awor 5 di juni ta bay yega Aruba e prome barco cu productonan di Venezuela, segun prome minister Evelyn Wever-Croes a sigura na Bon Dia Aruba.

Te ainda no ta conoci cua ta e productonan cu ta bay bin Aruba dialuna 5 di juni, pero loke si prome minister a menciona ta cu esaki ta bao encargo di Ministerio di Relacionnan Exterior, y den e dianan aki lo duna mas detaye.

Aruba a habri su frontera maritimo cu Venezuela dia 1 di mei ultimo. Wever-Croes a sigura cu  tin condicionnan hopi estricto pasobra ta importante pa tin bon control; entre otro, e barconan cu ta bin di Venezuela ta bin bao di un agencia na Aruba. Esaki kiermen cu niun barco ta permiti pa yega Aruba pa bende producto sin instruccion y responsabilidad di un agencia na Aruba. E tripulante di e barco no tin visa pa por drenta Aruba, por lo tanto, nan por keda 48 ora riba Aruba sin cu por sali for di e tereno di waf.

Dia 7 di mei e isla ruman Corsou a anuncia e yegada di dos barco carga cu lamunchi, awacati y banana cu a sali for di waf di La Vela de Coro, estado Falcon, caminda pa Corsou como parti di e reactivacion di intercambio comercial entre e islanan di Bonaire, Aruba y Corsou. Awor ta Aruba su beurt pa ricibi productonan cu prijsnan mas economico.

E dia ey, prome minister di Corsou, Gilmar “Pik” Pisas a haci un ceremonia di bonbini na botonan proveniente di Venezuela den marco di apertura di fronteranan maritimo y aereo. “Prome minister Sr. Pisas ta hopi gradicido na tur su miembronan di Gabinete Pisas II, e instancianan gubernamental y principalmente na tur e respectivo funcionarionan di Gobierno cu ta forma parti di e grupo di trabao. Un danki ta bay na Fundacion Marshe Nobo y DMO pa e bunita ceremonia cu nan a hinca den otro pa e momento tan memorabel aki,” el a sigura riba su rednan social.