E sesionnan a sirbi como un plataforma di dialogo habri y constructivo caminda a discuti e structura di Aruba su tarifa di awa.
Pa e sesionnan aki a invita Gobierno y representantenan di accionista, representante social, gremionan comercial y sindical, asociacionnan hotelero, sector di cuido, sector di naturaleza y agricultura, institutonan y cuido social, scolnan y empleadonan di WEB. Bou di guia di un facilitador participantenan tur a haya amplio oportunidad pa duna feedback y sugerencia riba e structura di tarifa di awa.
E proceso aki a haya atencion aña pasa na momento cu a ahusta tarifanan a consecuencia di prijs di combustibel halto y a palabra cu lo reevalua tarifa y structura di tarifa despues di 6 luna. Pa esaki WEB a contrata Sra. Marga Buys-Trimp, consehero y ex-regulator na Boneiro, pa asesora e proceso. Na un manera structura a bin ta cana e proceso pa identifica e gastonan y haci comparacion di tarifa den Reino Hulandes. Durante e sesionnan a presenta diferente opcion pa structura di tarifa di awa.
A base di e informacion ricibi durante e sesionnan, lo sigui recomendacion, incluyendo e diferente scenarionan pa Aruba pa loke ta trata e structura di tarifa di awa y tumando den consideracion e particularidadnan di nos pais. A base di e recomendacion e siguiente pasonan mester keda delinea.
Awa ta un recurso vital cu ta esencial pa mantene salud di tur persona y famia. Ademas, e ta un componente esencial pa sostene sectornan manera agricultura, industria, produccion di energia, turismo, desaroyo urbano, y Aruba su economia den su totalidad.
E contribucion di WEB su stakeholdernan den e discusion aki ta di gran importancia pa asina haya un bista mas amplio di tur aspecto relaciona cu consumo di awa. WEB ta gradici un y tur cu a participa na e sesionnan di consulta.
