Dia 30 di juni ta wordo conmemora e Dia Internacional di Rednan Social cu e obhetivo cu nan lo ta un herment cu lo permiti na e poblacion mundial un miho y mayor comunicacion, asina como tambe ta un medio pa mantene personanan informa, utilisando un plataforma globalisa manera Internet ta.
Rednan social ta structuranan cu ta wordo crea riba Internet y cu ta conecta personanan cu nan interesnan similar, nan ta permiti e creacion di vinculonan di un manera lihe y efectivo, unda distancia no ta un obstaculo pa cu relacionnan personal of laboral por tuma luga.
Origen di Dia Internacional di Rednan Social ta for di aña 2010, danki na un iniciativa di e website di noticia y tecnologia ‘Mashable’ di e cual Peter Cashmore ta su fundado.
E empresario reconoci aki a considera cu tabata necesario dedica un dia pa celebra un medio di comunicacion cu a transforma den un herment mundial pa cu miyones di persona ta mantene informa di un manera lihe, ademas cu ta un medio importante di entretenimento y tur esaki, mediante uso di Internet.
Awendia, e celebracion aki ta di caracter mundial y ya caba ta mas di 200 ciudad rond di mundo cu ta considera e fecha aki uno di relevancia, ademas, cada dia ta conta cu mas siguidonan y cada aña ta reuni pa organisa eventonan, foronan y conferencianan dedica na rednan social pa duna di conoce e potencial di marketing y publicidad cu ta wordo logra a traves di plataformanan como Instagram, Facebook, Whatsapp, Twitter, entre otronan.
Cu e paso di añanan, rednan social a bira un boom berdadero y a permiti cu miyones personanan na henter mundo por mantene conecta cada dia y sin duda alguna ta sigui suma mas siguidonan.
Rednan Social por wordo clasifica den dos tipo como: Horizontal of generico: Esaki ta esunnan cu no tin un tema determina, sino cu nan tin cualkier tipo di usuario. Nan ta funciona como medionan di comunicacion, informacion of entretenimento, tin hopi usuario y nan ta hopi popular, esey ta e caso di Facebook y Twitter.
Den e caso di Rednan Social Vertical: Ta esunnan cu ta relaciona personanan cu interesnan specifico den comun, como musica, hobby, deporte, por ehemplo Flickr, un red social cu e cual fotografia ta su topico. Den e rednan aki por haya e rednan vertical como LinkedIn, cu ta involucra individuonan cu ta comparti nan ambito laboral of ta busca amplia nan fronteranan laboral.
Pa drenta na un red social ta hopi senciyo ya cu ta implica yena un formulario cu datonan personal basico y asina ey por haya un nomber di usuario y un password cu lo sirbi na e usuarionan pa drenta di manera priva na e red, aunke e usuario mester cumpli cu rekisitonan pa e registro den e red social.
Di loke ta trata nan origen y evolucion, den e decada di añanan nobenta a surgi e web (www), tecnologia cu a facilita e proceso di acceso na un gran number di personanan pa Internet. Rednan Social tin su origen na mita di añanan nobenta y nan a bin desaroyando for di e momento ey te actualidad.
Classmates ta wordo considera e prome red social, el a wordo crea na 1995 pa e Mericano Randy Conrads, e red social aki tabata busca conecta di manera virtual ex-compañeronan di scol of universidad. Como e proyecto tabata exitoso, a cuminsa surgi mas rednan social cu e obhetivo di reuni amigonan y hende conoci.
Na 2003 a crea SixDegrees, un red cu tabata permiti tuma contacto cu otro miembronan di e red, crea un perfil y arma listanan di amigonan, e red social aki a basa den e teoria di “seis grado di separacion”, cu tabata afirma cu tur personanan ta haya seis persona na distancia, SixDegrees a keda activo te 2001.
Den e mesun aña a wordo crea Friendster, un red cu tabata permiti tuma contacto cu otro y comparti contenido online como potretnan, videonan, etc., el a keda activo cu e presencia di hopi usuario te 2015.
Como un contesta na e popularidad di Friendster a surgi MySpace, e cual a ser crea pa un agencia di Marketing, e red aki tabata dedica specialmente na musica y tecnologia, pa aña 2009 My Space tabata e red social cu mas trafico di usuario.
Pero, tempo despues a perde espacio cu e yegada di Facebook e cual a haya un popularidad hopi grandi debi na su plataforma y creciente desaroyo na Internet, cu a continua cu e aparicion di dispositivonan movil.
Un di e ultimo suceso di rednan social ta Tik-Tok, un plataforma di origen Chines cu ta permiti crea y comparti videonan, na 2018 a uni cu Musical.ly un red cu un fluho grandi di usuarionan hoben y disponibel den 39 idioma.
Pero con por wordo celebra e Dia Internacional di Rednan Social di aña 2022? Pa celebra e dia aki for di cualkier luga por publica cualkier informacion valioso a traves di un video of simplemente dunando su opinion riba e tema aki incluyendo e hashtag #DiadiRednanSocial.
