Dia Internacional di Jazz ta un dia den cual e jazz ser utilisa pa promove paz, fomenta libertad di expresion, fortalece respet mundial pa dignidad y derechonan humano ademas di avansa den desaroyo di dialogo entre diferente cultura.
Den un entrevista pa Bon Dia Aruba, e musico Carlos Bislip a informa cu riba dia 30 di april na nivel mundial ta ser celebra e Dia Internacional di Jazz na unda Aruba ta preparando cu esaki cu e presentacion di diferente grupo.
Bislip a informa cu 30 di april cu ta e Dia Internacional di Jazz ta cay riba un diadomingo y en grupo di artistanan ta bay tin un grupo di alumnonan cu ta yama Caribbean Combo, tambe ta bay tin dos artista invita di Merca cu a gradua den studionan di Jazz y ta bay toca cu e alumnonan.
E prome presentacion ta bay ta den man di Caribbean Combo, di dos Eric Jan Eman and The Groove Hunters cu ta toca Jazz Funky, di tres grupo cu ta bay presenta ta Carlos Bislip cu su quinteto, despues Reno Steba cu su grupo Oruba e cual ta experimentando cu musica di Aruba den Jazz y Franklin Granadillo Band na Kulture Cafe na San Nicolas for di 7or te cu 10.30 di anochi.
Bislip tambe a conta cu na 2006 ora el a bay na un conferencia internacional di educadornan di Jazz na New York el a conoce e instituto Smithsonian na Washintong, Merca cu ta designa full e luna di april na Jazz cu ta yama “Jazz Apretiation Month” den cual nan a encurasha tur e miembronan internacional y educadornan pa cuminsa haci algo na nan pais, e instituto aki ta haci’e caba na Merca y nan kier pa hopi hende haci algo pa Jazz na nan pais.
Ora Bislip a yega Aruba el a bin cuminsa organisa e celebracion di Dia Internacional di Jazz na Aruba cu a tuma luga na Cas di Cultura den tempo ey. E siguiente añanan el a haci’e dilanti Biblioteca Nacional unda el a pone e hobennan hunto pa toca combina cu musiconan profesional segun el a sigura. “Ma sigui haciel’e tur aña na diferente luga y e aña ki mi ta kere mi ta cumpli 18 aña sin conta e aña di pandemia,” Bislip a sigura.
Na Aruba tin diferente musiconan di Jazz y e idea di e evento aki ta nan por haciel’e den dos dia pero Bislip a sigura cu nan no a conta cu suficiente fondonan pa haci’e di e forma ey.
Bislip a expresa cu Jazz ta e idioma internacional cu ta comunica comunidadnan cu otro, pa e motibo ey Unesco a declara e dia 30 di april como e Dia Internacional di Jazz “Unesco a ripara cu mas cu otro musica Jazz ta conecta humanidad cu otro y p’esey mi kier invita full pueblo di Aruba pa bin presencia un momento hopi unico unda bo ta wak hobennan ta toca cu profesionalnan di afo y e biaha aki e mescla di e lineup di artistanan ta bay ta hopi varia, e ta bay ta un anochi hopi unico den cual e actividad aki ta bay ta gratis y si personanan kier reserva nan luga nan por yama na Kulture Cafe pa nan por haci nan reservacion.” Bislip a afirma.
Unesco a decreta e dia na aña 2011, cu e obhetivo di duna di conoce un movemento musical di un balor educativo grandi, asina como e recurso valioso cu ta contribui na intercambio cultural, dialogo y cooperacion entre e pueblonan na nivel mundial.
Jazz ta un genero musical cu ta inclui melodianan Afromericano y mesclanan di otro ritmonan, basa den improvisacion y interpretacion liber.
