Un polemica a cuminsa e siman aki ora cu gobierno di Aruba a dicidi di trece dilanti un anuncio encuanto Zwarte Piet, ciudadanonan riba rednan social a cuminsa reacciona y bisa cu ta existi un ley cu tin mas prioridad na e momentonan aki, cu ta e ley pa redobla castigo pa pedofiel. Esaki lo keda trata awe, diabierna, pa 9or di mainta, den Parlamento.

Riba rednan social un grupo a wordo crea tocante e topico aki, cu e proposito di duna di conoce e malcontento cu ciudadanonan ta sinti pa loke ta trata e castigonan cu personanan acusa di pedofilia ta haya. Aki cualkier persona cu un Facebook account por join e grupo y por mira diferente comentario y hasta potretnan di personanan cu nan mes ta acusa di ta abusador.

Tambe, a wordo treci dilanti mediante e gruponan y reunionnan, cu pa dia 3 di juli tin planea un protesta contra pedofiel dilanti di Corte Comun di Husticia di Aruba cu despues lo sigui bay dilanti Parlamento. Nan lo ta bisti cu paña preto pa asina, manera nan mes a sigura, pone un poco mas presion riba gobierno, Ministerio Publico y huesnan pa trata y implementa e ley. E dia aki lo trata un otro sentencia den Corte; nan kier mira con esaki ta bay ya cu segun nan opinion ultimo tempo den cada caso cu ta bin dilanti den Corte, e castigonan cu e acusado ta haya ta laga e ciudadanonan keda desapunta. Esaki a duna e impulso pa nan expresa nan punto di bista un biaha mas.

Aruba Sex Offender, Pedophile Public Registry tin ya caba 4.210 miembro y tur dia ta hayando mas reaccion di esunnan cu kier uni forsa. Tambe ta publica historia di casonan den e grupo, cu e meta di duna di conoce na comunidad nan dolor, nan rabia, nan malcontento pa loke ta trata e parti penal y e impotencia di parti personal cu nan ta sinti, como tambe pa duna sosten na esnan cu a wordo abusa sexualmente.

Algun di e historianan ta wordo conta como un manera di laga nan sentimentonan liber; mayoria di nan ta duna di conoce cu nan abusador tabata un persona cerca di nan famia of un familiar, cu ora nan a dicidi di conta na historia pa haya sosten, nan no a haya oido den nan famia mes, pa motibo cu nan famia no por kere cu e persona en cuestion por a haci esey.

Aruba ta un di e paisnan na unda segun hopi persona abuso sexual ta tuma lugar casi manera un custumber, hopi historia tin pa conta, hopi hende a keda afecta psicologicamente cu na final di dia nan bida pa nan mes, no tin e balor cu e ta suppose di tin.

Otro topico cu por a mira den e grupo aki cu a hala atencion ta algun simbolo y logo cu un persona cu ta pedofiel ta usa, esaki ta hopi importante pa trece dilanti como un medida di proteccion pa e muchanan; mayornan mester tene cuenta hopi bon y sigur cu loke ta e contenido digital na cual muchanan por ta exponi ora nan ta usa internet.

Pero no solamente mucha ta exponi na rednan social, mucha por ta exponi na cualkier momento, mayornan di henter mundo tin cu percura pa vigila cualkier simbolo of señal cu lo por indica cu ta existi algun tipo di peligro pa nan yiu. Desde algun aña a duna di conoce algun serie di simbolo cu lo por yuda mayornan den e tarea di proteccion di nan yiu; e simbolonan ey ta wordo utilisa pa pedofiel pa asina duna di conoce nan preferencia sexual of simplemente indica cu e mucha “ta disponibel”.

E yamado ta pa comunidad henter tene na cuenta cu dia 3 di juli, e protesta lo tuma lugar, peticionnan lo wordo anuncia y husticia lo wordo pidi, importante ta pa esnan cu ta uni na e causa, pa sigui cu e lucha y pa esunnan cu a wordo abusa pa sigui bay dilanti y no cay na caminda, pa husticia por prevalece.

Ta obvio tambe cu no ta solamente e castigonan mester cambia, pero tambe henter e proceso cu personanan cu ta bay denuncia mester pasa aden, cu tin demasiado obstaculo ainda, di tal manera cu hopi caso no ta yega mes na Corte. Hopi ta expresa nan malcontento tambe cu e parti aki, unda e proceso di mes ta doloroso caba pa e victima, pero e mester pasa den hopi tramite complica pa forfin un caso yega unda e mester yega. Aki ta unda tin hopi cos pa drecha ainda.