BARiO UNiCO ta un proyecto cu ta cay bou di CEDE ARUBA y ta enfoca riba e forma con pa reactiva y sostene Centronan di Bario y e desaroyo di bario na Aruba. Pa yuda yega na e metanan pa motiva comunidad pa bolbe Centronan di Bario, crea union, y promove salud y bienestar den bario asina CEDE ARUBA a uni forsa cu IBiSA na 2023.
Mirando e necesidad pa duna informacion, CEDE ARUBA y IBiSA a start cu proyecto “BAN CAYA” den 2023. Noord tabata e prome districto cu a wordo scogi y despues a sigui cu Paradera/ Piedra Plat. Dos evento di BAN CAYA cu tabata exitoso y cu bon resultado pa e bario en general y tambe pa e Centro nan di Bario.
Mirando e desaroyo positivo aki CEDE ARUBA y IBISA a bay di acuerdo pa sigui cu BAN CAYA den 2024 cu 4 edicion mas. E prome e edicion lo bay ta den San Nicolas diasabra awor 27 di April. Caya Pastoor Hendrikstraat for di rotonde chikito banda di Filomena College te cu St. Paulus School lo wordo cera pa realisa e evento aki. BAN CAYA 2024 na San Nicolas ta wordo presenta pa Centro di Bario Brazil y Centro di Bario Lago Heights.
Lo tin un total di 46 punto di actividad y informacion riba henter e ruta y tambe bou di overdekte di YMCA y den Stadion di Joe Laveist. BAN CAYA San Nicolas lo tin un variacion grandi den entretenimento, entre otro lo tin seccionnan deportivo, social, cultural, arte y culinario. Pa nos muchanan lo tin un kids corner, informacion di salud den skina di salud, weganan pa famia y por cumpra dushi cuminda y coy bebe. Actividad ta cuminsa di 4’or di atardi te cu 8’or di anochi. Tur show cu wordo duna ta di talentonan di San Nicolas. Esaki a pone tambe cu a busca bandanan di San Nicolas pa trece ambiente y lo t’ey Groove Masters y “ATANIRO and Band” pa cera BAN CAYA KING’S Edition. Filomena College a pone su tereno disponibel pa asina tur hende por para nan auto.
Ora bo yega por pidi un folder di informacion di e diferente tentnan y lo anuncia cada bes cu lo haci actividad durante e atardi. Aruba completo ta wordo invita pa celebra dia di Rey den Ban Caya na San Nicolas!
