Parlamentario Edgard Vrolijk (MEP) ta invita nos comunidad pa dia 25 di october proximo lo bin Parlamento, ya cu e dia ey CAft lo reuni cu e miembronan di nos organo legislativo.
Vrolijk a laga sa cu e no ta bay reuni cu CAft, pero e lo ta afo hunto cu pueblo, y seguramente otro coleganan lo sigui su ehempel. E ta kere cu CAft no mester bin cu splicacion cerca e parlamentarionan riba nan conseho pa Hulanda bin cu un ‘aanwijzing’ pa pais Aruba. Esaki ta un posicion personal di dje y no di su fraccion, el a aclaria.
Si Hulanda ta bin cu un ‘aanwijzing,’ pais Aruba lo cana su caminda legal, ademas di otro caminda mas pa cana. Ya cu e ta sinti cu Hulanda kier bin cu un proceso di recolonisacion moderno. Esaki pasobra nan ta scuchando for di pueblo -segun e parlamentario menciona- cu nan no ta bay carga ‘e abuso aki di Hulanda mas.’
Segun e Parlamentario di e fraccion di MEP, pais Aruba ta atrobe den incertidumbre y menasa di haya un ‘aanwijzing.’ Esaki despues di e ultimo carta cu e organo di supervision financiero (CAft) a manda pa e conseho di minister di Reino. P’esey el a invita pueblo di Aruba pa bin topa CAft, ya cu e ta haya cu ta ‘pueblo bo kier primi’.
Vrolijk ta kere cu a yega ora pa CAft mes splica pueblo directamente riba con nan a haci nan trabou di supervision financiero. E ta haya cu na momento cu CAft ta bin papia di cifranan riba gasto di personal cu gobierno di Aruba (MEP-POR-RED) no por cumpli, ta bon pa bay den pasado. Por ehempel na 2015/16, bou e gobierno anterior (AVP) nan mester cumpli pa baha e contract di personal na 28 miyon, pero nan no a cumpli, y e ta puntra su mes: “Unda e KB (koninklijk besluit) a keda? Unda e menasa a keda!” E no sa unda CAft tabata e tempo aya.
Awor e ta sinti cu gobierno ta wordo menasa debi cu nan mester di personal pa ehecuta e social crisis plan. E ta haya cu Hulanda mester stop di menasa, y si Hulanda kier duna un KB, dun’e. Pero nan mester duna un pakico tambe, caminda mester compara e maneho financiero actual cu tur e añanan anterior, y pakico Hulanda no a duna un KB. E no ta nenga cu Aruba ta den Reino, pero nos mester wordo trata cu respet y obhetivamente.
Ademas e ta haya cu CAft ta bin cu un serie di cosnan cu no ta cuadra. Pa Vrolijk, gobierno di Aruba ta cumpliendo cu e normanan di e protocol firma cu e gobierno di Reino. Te hasta nan ta trahando pa presupuesto 2020 lo tin un surplus di 25 miyon. El a agrega cu locual gobierno di Aruba ta pidiendo ta tempo y espacio, ya cu gobierno no a pidiendo niun florin na Hulanda.
