Relaciona cu e declaracion di inkomstenbelasting 2018, Departamento di Impuesto tin e siguiente participacion. Fecha oficial di otorgamento E fecha oficial di otorgamento di e formulario di declaracion di inkomstenbelasting 2018 ta 1 di juli 2019. Conforme ley, e contribuyente tin dos luna pa yena y entrega su declaracion.
E fecha final pa entrega e declaracion ta 2 di september 2019. Prolongacion di termino Si un contribuyente no alcansa pa entrega su declaracion pa dia 2 di september 2019, automaticamente e lo haya 3 luna mas di tempo. Pues no ta necesario pa entrega un peticion por escrito. Den caso di prolongacion, e fecha final ta bira 2 di december 2019. Pues e contribuyentenan por haya un total di 5 luna di tempo pa entrega e declaracion. Despues di dia 2 di december 2019 no lo duna mas prolongacion di termino. E cliente lo mester percura pa completa su declaracion y entreg’e mas lihe posibel. Saca copia Ta recomendabel pa saca copia di e declaracion y trece esaki tambe pa por stempel e na momento di entrega esun original.
Asina e contribuyente lo keda cu su prueba di entregamento. Ta importante pa entrega e declaracion Ta importante pa cumpli cu e entregamento di e declaracion. Cu e declaracion e contribuyente ta haci uzo di su derecho door di declara na inspector di impuesto kico exactamente el a ricibi na entrada y cuanto su gastonan tabata. Si no entrega e declaracion, inspector lo impone un cobransa taxativo. Esaki ta nifica cu inspector mes lo calcula e entrada fiscal pa e contribuyente. Alabes e contribuyente lo por haya boet di 5% di e suma di inkomstenbelasting. E boet ta minimo Afl. 250 y maximo Afl. 10.000. Por sigui e pagina di Facebook https://www.facebook.com/impuestoaruba/ of download e app “BO impuesto” (pa iOS) di Departamento di Impuesto pa keda bon informa na tur momento.
