Programa ‘National Plan for Stray Animal’ oficialmente a ser conoci ayera den un conferencia di prensa di minister di Transporte, Integridad, Naturalesa y Asuntonan di Adulto Mayor, Ursell Arends e cual a sigura cu ta un plan di conscientisacion pa comunidad.

El a conta cu primeramente dia 10 di december ultimo nan a presenta esaki na Parlamento di Aruba pa asina ey pidi su aprobacion pa haci un transferencia di fondonan, pa inverti den e plan aki pa crea conscientisacion pa comunidad y tambe pa atende e problematica di cacho y pushi riba caya.

Pa loke ta trata e plan pa atende cu e problematica, Arends a señala cu e ley di cacho cu a cuminsa drenta na vigor na aña 2012 y na 2019 a cuminsa crea conscientisacion y tambe a bin cu un centro di control di cacho pa yuda atende cu a problematica aki, segun Arends a menciona.

Esaki tambe ta un campaña di advertencia caminda cu den ultimo lunanan nan a wordo informa y acerca Post Aruba N.V cu pa hopi biaha e partidonan di carta ta esun cu ta wordo afecta y ta wordo mordi door di cachonan cu ta canando los riba caya, alabes nan a wordo acerca di varios instancia di ciclistanan y deportistanan cu tambe ta wordo mordi pa e cachonan cu ta los den bario causando molestia pa e habitantenan.

“Cu e plan aki nos kier stimula e doñonan di mascotanan, pa ta un bon doñonan y esey ta loke nos kier crea” el a bisa.

Dia 11 di april awor conhuntamente cu Post Aruba N.V nan lo cuminsa un campaña di advertencia caminda cu como doño responsabel nan kier stimula pa tene nan den cura manera ley ta stipula y si a caso partidonan di carta di Post Aruba N.V ta nota cu tin un cacho riba caya, nan lo laga un carchi di advertencia pa asina por atende cu e cacho cu mester ta den cura.

Ademas, Bureau City Inspector, Dog Control Unit y Cuerpo di Polis di Aruba tambe ta traha den proyecto aki na unda cu si acaso mas cu un biaha e persona mester haya un advertencia e persona lo haya un bishita di Bureau City Inspector y Cuerpo di Polis lo duna multa di entre 3.000 pa 10.000 florin.

Cu e plan aki tambe tin diferente proyectonan segun Arends a señala y cu lo tuma luga e aña aki, pa stimula comunidad pa ta consciente y tambe pa ta un doño responsabel, ademas di esey, tambe nan lo inverti fondonan pa crea un data base caminda nan lo conecta tur veterinario, centro di control di cacho, Bureau City Inspector, Cuerpo di Polis, Aduana y tambe Serlimar cu a traves di chip nan lo por conoce di ken e cacho ta, pa asina hiba e cacho back na su doño.

“Esaki ta e pasonan cu nos ta tumando, esaki ta e paso cu gobierno tuma pa inverti fondonan pa crea mas conscientisacion”, el a declara.

Di su parti, representante di Post Aruba N.V, Katharine Lacle a indica cu frecuentemente empleadonan di e organo aki ta pasa pa momentonan hopi peligroso pa motibo di cacho riba caya, nan ta haya accidente of nan ta wordo mordi pa e cachonan “y cada biaha cu un trahado ta cay afo esaki tambe ta perhudica nos operacionnan interno y cu pronto comunidad lo wak e videonan cu lo sali na unda lo por observa kico empleadonan ta experiencia tur dia riba caya”, el a menciona.

“Esaki no ta un situacion cu ta afecta solamente nos trahadonan sino tur e hende cu ta core bais, cu ta haci deporte, esaki no ta algo solamente pa nos sino pa henter comunidad” Lacle a bisa.

Aña pasa den un reunion cu Bureau City Inspector, Cuerpo di Polis y Dog Control Unit a dicidi di traha hunto den un proyecto strategico pa yuda conscientisa e comunidad unda cu dialuna 11 di april nan lo cuminsa reparti e carchinan di advertencia na tur e post di e casnan cu nan cacho ta riba caya, ademas nan ta bay anota esey den un lista cu tur siman nan lo manda na Bureau City Inspector pa nan bay bishita e casnan ey cu posiblemente lo por resulta den un multa.

Ta importante pa destaca cu e problematica di bestianan los riba caya tin basta añanan caba, cu ta existi un ley di cacho, cu a pone Dog Control Unit y un Centro di Control di Cacho, pero sterilisacion ta keda como otro posibel solucion unda cu gobierno tambe por usa fondonan conhuntamente cu fundacionnan cu ta rescata mascotanan riba caya pa nan sterilisacion.

Igualmente ta existi doñonan cu ta tuma cachonan of pushinan ora nan ta babynan pero mester ta consciente cu esaki ta un responsabilidad unda cu un mascota ta costa placa y tempo, si no ta consciente di esey, no ta bale la pena tin un pa ora lo bira adulto e por finalisa riba caya pa via cu e doño no tin e medionan suficiente pa su mantencion.