E bida di un inmigrante no ta facil. Na momento cu e persona dicidi di bandona su pais natal, e trabou duro y e lucha ta cuminsa pa logra cumpli cu e metanan. Bon Dia Aruba a combersa cu un inmigrante Venezolano, inicialnan N.N., cu a tuma e decision di bin Aruba algun aña atras cu su yiunan buscando un miho bida pe y su famia.

N.N. a yega Aruba for di Venezuela dia 29 di november 2019 cu e meta pa traha pa un miho bida. Su casa a bin Aruba prome y despues di algun tempo e tambe a traha su maleta y di su dos yiunan y a subi avion rumbo pa Aruba.

Manera hopi inmigrante no solamente na Aruba, pero rond henter mundo, N.N. a bandona su pais natal pa busca un miho bida, un miho futuro, specialmente pa su yiunan. El a conta cu tin diferente factor cu a contribui pa tuma e decision di sali for di Venezuela y bin Aruba.

Un di e factornan aki, y uno hopi importante, ta e situacion economico. No ta un secreto cu Venezuela pa hopi aña caba ta pasando den un crisis economico, social y humanitario grave cu a obliga miyones di Venezolano bandona nan pais y busca bienestar na un otro luga.

Escasez di alimento tambe a hunga un rol grandi, pues esaki ta bay man den man cu e situacion economico duro. Insiguridad y problema constante cu e servicionan publico, manera coriente y awa, tambe ta cay den e lista aki.

“Nan ta hopi factornan y di berdad nos a tuma e decision pa duna nos yiunan un miho bida, un miho futuro y e oportunidad pa nan crece trankil y feliz”, el a expresa.

N.N. ta conta cu na cuminsamento, ora nan a yega Aruba, e experiencia tabata duro, dificil pa adapta, pero di otro banda e tabatin su partinan positivo. Su casa tabata trahando y nan tabatin acceso na hopi cos cu nan no tabatin acceso na dje ora nan tabata na Venezuela.

“Compara cu Venezuela nos tabatin e facilidad pa cumpra alimento, nos ta biba mas trankil pasobra e siguridad tambe obviamente ta haci diferencia y nos no tin cu worry cu nos no lo tin luz of awa pa dianan largo”, el a comenta.

A pesar di tur e cambionan positivo, cambionan pa miho, un topico cu tog ta causa tristesa ta e falta di su famia. N.N. ta conta cu e no ta nada facil pa ta leu di su famia, leu di e personanan cu ta su apoyo den momentonan di dificultad, den momentonan di necesidad y di tristeza.

“E ta hopi dificil pa ta leu di mi famia y e falta cu nan ta haci ta hopi grandi. Pa nos famia latino ta un parti hopi importante di nos bida y pa laga nan atras no tabata un decision facil. Tur dia mi ta pensa riba nan. Mi ta spera cu den un futuro cercano mi por tey cu nan atrobe y disfruta di nan compania, amor y cariño”.

Di otro banda N.N. ta gradici Dios pa tur e amistadnan cu el a crea aki na Aruba den e tempo cu e tin bibando aki pasobra esey ta e personanan cu e, di un manera, ta considera su famia na isla.

N.N. ta enfatisa tambe cu na Venezuela su yiunan no tabatin e acceso na educacion di calidad. Na momento cu nan a bandona Venezuela, e ta conta, e educacion no tabata constante y ya caba nan a cuminsa sinti e deterioro den e sistema educativo na e pais.

E ta bisa cu Aruba ta un bendicion pe y principalmente pa su yiunan pasobra na Aruba si nan tin e oportunidad di un ricibi educacion calidad halto, educacion cu lo brinda nan un miho futuro y lo habri hopi porta pa nan yen di diferente posibilidadnan pa continua cu nan estudio.

“Por ehempel mi yiu grandi ta gusta su scol, e tin hopi amigo y e gusta siña. Te aworaki e ta bisami cu e kier sigui studia y esey ta algo cu ta yenami cu un alegria inmenso pasobra esey ta e motibo pakico nos a bandona Venezuela. Pa nan. Pa nan futuro y pa nan tin un bida bon”, el a agrega.

Actualmente N.N. ta traha for di su cas y tin un mini salon caminda e ta atende su clientenan. Su casa ta traha riba su mes y aki aya e ta busca trabounan chikito. N.N. ta splica cu den e tempo cu e tin aki na Aruba e no a yega di experiencia xenophobia ainda personalmente, pero e ta conta cu su casa si a yega di pasa aden.

“E si ta sinti manera e desprecio, of e discriminacion y sobretodo ora e ta trahando, e abuso cu nan kier haci pasobra e no tin documento. E ta duro p’e pasobra e mester traha pa nos por paga e gastonan esencial, e gastonan necesario, pero na mesun momento e no por soporta un trato inhumano y abuso”.

Por ultimo N.N. su mensahe pa otro inmigrantenan ta: “Si bo ta un inmigrante y bo ta pasando den duro, no give up, corda ariba e motibo, e rason pakico bo a dicidi di bandona un pais cu ya no tabata ofrecebo ningun beneficio, siguridad pa bo y bo famia. Enfoca ariba e cosnan positivo y sigui bay pa dilanti pasobra no tur dia ta un dia scur”.