Den weekend, Hues di Corte di Prome Instancia a duna veredicto den e caso entre Director Di Stefano Wernet y Lotto Pa Deporte. Wernet a entama e caso despues cu e Raad van Toezicht di e fundacion a retir’e, acusando su persona di malversacion di fondo.
Na cuminsamento di e aña aki, Lotto pa Deporte a suspende Wernet pa haci un investigacion di malversacion di placa, relaciona cu un curso cu Wernet mester a tuma, como tambe ‘performance bonus’. Algun luna despues, a retira Wernet for di su puesto. Como cu Wernet no tabata di acuerdo cu e retiro, el a entama un caso contra e fundacion.
Segun un relato di Diario, Lotto pa Deporte a argumenta cu mester a retira Wernet urgentemente pa motibo di malversacion di fondo. Den esaki nan a acusa Wernet di tuma Afl. 6,700.- pa asisti na un curso, pero no a duna prueba di esaki. Tambe cu el a tuma adelanta su ‘performance bonus’ sin autorisacion. Ademas, Hunta di Supervision a acusa Wernet di no cumpli cu su contract door di faya di presenta resultado financiero na Hunta di Supervision.
Pa cu malversacion, e fundacion a acusa Wernet di a transferi 612,046 florin di cuenta di Lottery pa e cuenta di e fundacion, causando un reclamo di e banco Canades, cual a conduci na un resultado negativo na 2018 pa e fundacion. Tambe ta acus’e di haci dos transferencia di 100 mil florin na e cuenta di e fundacion for di un cuenta pa Piscina Olimpico, y di a haci cantidad di donacion fuera di presupuesto y manda un saldo negativo den cuenta bancario, violando un anterior prohibicion di e fundacion. Finalmente, a acus’e di viola su contract door di no mantene secreto.
Wernet a argumenta cu e parti di estudio, e tabatin derecho riba dje segun su contract, y cu e motibo cu na final e no a sigui e curso tabata fuera di su man, y cu Hunta di Supervision sa esey. Sinembargo, e fundacion ta cuestiona e falta di prueba si a sigui of no e curso, y kico a pasa cu e placa.
Wernet tambe a desmenti di a tuma e ‘performance bonus’ adelanta, sino cu a tuma adelanto di ‘13e maand’, di acuerdo cu su contract.
Pa e acusacion di malversacion di fondo di e cuenta bancario di e fundacion na diferente cuenta, Wernet a bisa cu Hunta di Supervision tabata bon na haltura, y cu e tabatin aprobacion di e fundacion pa haci esaki. Asina tambe a aclaria cu a tuma e placa di Piscina Olimpico pa mehora e sistema di pomp, pues tabata consistente cu e uzo stipula pa e fondonan.
Corte di Prome Instancia a dicta na fabor di Wernet, cu no tabatin hustificacion pa e retiro inmediato. Den e veredicto, a bisa cu tin prueba suficiente cu no tabatin base pa retiro inmediato, locual ta nifica cu Wernet tin derecho di sigui ricibi su salario, cual e no ta ricibi desde januari. Hues a mustra cu por cobra interes maximo di 15% riba e salario atrasa. Corte ademas a duna orden pa e fundacion permiti Wernet continua su trabou como Director.
Finalmente, Corte a duna un multa di mil florin pa cada dia cu no cumpli cu e sentencia, cu un maximo di 100 mil florin. Ademas e fundacion mester cubri e gasto di e caso, incluyendo abogado di Wernet.
