Diaranson 22 di januari Corte den Prome Instancia di Aruba a dicta sentencia den caso Flamingo. Caso den cual e sospechoso principal tabata actual parlamentario Otmar Oduber y ken a ser declara culpabel di fraude, intento di fraude y abuso di funcion. Caso Flamingo tabata consisti di un total di seis caso, di e seis casonan dos persona a haya vrijspraak y cuater a haya castigo.

E prome caso cu hues a dicta sentencia di dje tabata e caso di yiu homber di Otmar Oduber, Jeandrcik Oduber. Den e caso aki e parlamentario tabata ser acusa di soborno pasivo. Pa loke ta su yiu di Oduber, Jeandrick Oduber, hues a indica cu pa motibo di falta di prueba ta declara Jeandrick Oduber liber di e acusacion y no a ricibi ningun castigo.

E siguiente caso cu hues a dicta sentencia den dje tabata caso di Aisha Esser, ken tabata ser acusa di comete soborno pasivo door di priminti trabou a cambio di trabou politico y di acepta soborno y di abuso di poder.

Den e caso aki tambe hues a duna ‘vrijspraak’, ya declara Esser liber di tur acusacion. Un hecho cu a duna tanto Esser como su abogado hopi alegria ya cu desde principio, segun nan a indica, nan no por a compronde pa ki motibo a inlvucra Esser den e investigacion di caso Flamingo.

Pa loke ta trata caso di e spookmabtenaarnan, Laurence Philips y Gilbert Tiel, niun di dos tabata presente den corte, tambe Oduber como e dos co-acusado a ser haya culpabel pa fraude y abuso di poder.

Acusado Philips a ser declara culpabel di estafa pais Aruba door di ricibi un salario pa traha como ambtenaar, pero en realidad no a eherce su trabou. El a ser condena na 120 ora di trabou comunitario cu un castigo di prizon condicional di tres luna y un tempo di prueba di tres aña.

Gilberto Tiel a ser declara culpabel di estafa di pais Aruba y a ser condena na 120 ora di trabou comunitario cu un castigo di prizon di tres luna condicional y un periodo di prueba di tres aña tambe. Tiel a haya vrijspraak pa e acusacion di soborno oficial activo.

Pa loke ta e caso di e terenonan na Malmok, pa cual parlamentario Oduber a ser declara culpabel, co-sospechoso Richenella Wever, un ex ambtenaar na DIP, tambe a ser declara culpabel. Wever a ser condena na 180 ora di trabou comunitario cu un castigo di prizon condicional di seis luna pa intento di estafa, falsificacion y abuso di su funcion. Wever tambe a ricibi un periodo di prueba di tres aña.

Abogado di Wever Jairon Odor a indica cu tabatin diferencia di opinion den loke hues a trece dilanti, pero e punto principal di henter e caso ta cu no ta compronde pakico a tuma cinco aña pa duna un veredicto asina. El a indica cu lo bay dialoga cu su cliente pa wak si ta bay apela of no e sentencia di hues.

Un di e aspectonan cu tambe a sobresali ta e hehco cu hues a declara cu e denuncianan cu ex minister y ex parlamentario Marisol Tromp a haci contra Oduber no tabata falso. A pesar cuna mas di un ocasion Oduber a sigura cu Tromp tabata “gaña”.

Ademas hues a sigura tambe cu no tabatin metemento politico den Ministerio Publico, locual pa defensa tabata un golpi pasobra un parti grandi di e ekipo di defensa di Oduber tabata basa riba e ponencia cu, entre otro, e denuncia di Tromp contra su persona tabata falso.

Mesun cos ta conta pa e indicacionnan di Oduber cu c OM, Landsrecherche, BCI, lo a falsifica documentonan, cu a tene documentonan atras y cu tin denuncianan falso cu a ser haci.

Hues a splica cu tur esaki a ser bari for di mesa y a hasta bisa cu e no ta haya ningun sosten den e dossier pa esey sostene e acusacionnan aki di e defensa.

“Esey pa nos ta importante pasobra ta confirma trabounan cu nos ta haci, pero tambe autoridadnan cu ta haci investigacion, BCI, Landrecherche etc. ta traha manera debe ser y na unda cu hues awe ta confirma esey den e decision cu ta bisa cu OM por wordo declara admisibel den e persecucion contra Sr. Oduber. No ta asina mescos a wordo treci dilanti tur e biahanan ki cu lo ta inventa of cu tin un persecucion politico, absolutamente cu no,” van der Biezen a enfatisa.

Pa loke ta e castigo hues a haya ta na su luga a base di tur e pruebanan cu tin, cu Oduber tin cu haya un castigo di 365 dia di prizon di cual 319 dia ta condicional, y un tempo di prueba di tres aña. Esey kiermen cu 46 dia, cual el a sinta caba, esey e ta hay’e como castiggo incondicional di prizon. Esaki ta nifica cu Oduber no mester bay sinta den KIA.

Ademas di e castigo di prizon hues a dicta cu Oduber ta haya castigo di trabou comunitario di 240 ora y si e no cumpli cu esaki e ta haya 120 dia cera. Tambe hues a haya cu Oduber mester haya, cual ta algo cu OM tambe a pidi, un bijkomende straf cu ta kita e derecho pa por traha den un funciona publico, como ambtenaar y tambe ta kita e derecho cu comunidad di Aruba por vota p’e den un cualkier eleccion pa un periodo di tres aña.

No ta conoci ainda si OM of ekipo di Oduber ta bay apela. Ambos partido a indica cu lo mester bay evalua y studia e veredicto prome cu tuma un decision. E partidonan tin dos siman di tempo pa dicidi si ta bay apela e sentencia di hues.