Mauritsz de Kort no tin mucho tempo pa prepara pa tuma su encargo como Presidente di Corte Comun di Corsou, Aruba, St. Maarten, y islanan BES. “Bida a bira un tiki mas druk,” de Kort a bisa na harimento.

Su trabou como Huez y actual Vice Presidente di Corte, mester continua, aunke cu un porcentahe mas abou di caso, pero alabes, e mester cuminza prepara pa e trabou di maneho nobo cu ta djis otro reto mas pa e mucha homber di Pos Chikito, Aruba, cu semper a mira educacion como un vehiculo pa crece den bida. “Desde cu e otro hueznan a dicidi pa nombra mi, e Presidente actual y ami a cuminza traha riba e transicion, y esey ta encera cu tur siman ta sinta hunto unda ta repasa temanan cu e como Presidente ta encarga cune.” Den otro palabra, e ultimo simannan aki Mauritsz de Kort ta dedica 70 porciento di su tempo pa casonan cu ta riba su schema, cu ta casonan penal y e otro 30 porciento ta pa prepara pa e funcion nobo. Entrante prome di Januari, mr. de Kort lo dedica su mes na casonan di apelacion pa un parti, y hunto cu su Director di Operacion (C.O.O) y otro Vice Presidentenan di Corte ( St. Maarten y Aruba por ehempel), hiba e maneho di Corte Comun. “Eigenlijk mi ta hala di funcion, for di miembro di directiva (Vice Presidente) pa Presidente di e Directiva (Corte).”

 

Corte ta igual riba tur e islanan

Aruba, particularmente ex Minister di Husticia, Sr. Rudy Croes †, tabata para riba pa Corte Comun a establece su sede principal na Aruba y segun Huez de Kort, locual a logra ta cu tur caminda unda tin hurisdiccion, Corte tin su sede principal. Pues Corte no tin un solo sede. Asina a caba cu e discusion cua establecimento ta mas importante cu otro. Ademas, e organisacion ta di tal indole cu tur Huez di Corte Comun por traha riba tur seis isla. “Di e manera ey ta duna un aporte mas structural na unidad den reparticion di derecho. Mi no ta si e ta miho, pero en todo caso den e structura aki, ta hopi mas flexibel den e manera con ta duna otro aporte.” Por ehempel, na Aruba tin mas caso penal y coleganan di Aruba por pidi hueznan na Corsou of St. Maarten ayudo pa e casonan adicional. “Asina nos a organisa cu un huez di Corsou tabata bay Aruba pa un aña largo, haci e casonan penal pa dos tres dia, y bolbe Corsou, sin cu mester depende pa e keda apunta pa haya hurisdiccion na Aruba. E simple hecho cu e huez ta miembro di Corte Comun di Husticia e tin derecho caba pa traha riba tur e islanan. Esey ta encera tambe cu mester tin un huez na Saba, lo mi por bisa uno cu tin un poco tempo, pa e por bay Saba pa un caso specifico.”

Ambicion

De Kort a cuminza su educacion na un scol di bario, Kukwisa School, awor Scol Santa Famia y despues a bay Colegio Arubano. Un amiga di cas, Amelin Flanegin a studia ley y como alumno na Colegio, e tabata tende con e tempo ey, e hurista Arubiano tabata papia cu hopi pasion pa su pais. Y locual el a deduci di Amelin y otronan, ta cu derecho ta un manera cu por regla comunidad. “Esey a yama mi atencion.”

Aunke cu semper e tabata sinti un inclinacion pa ley, e hoben a dicidi cu mirando cu e paso di Aruba pa Hulanda ta uno grandi, cu miho e atende HEAO prome, esta un estudio HBO en bes di WO. Y e estudio cu el a scoge tabata Maneho, Economia y Ley. “E tabata un stap mas largo. E tabata cuater aña adicional. Pero mi no a haya duele, pasobra e klasnan tabata mas chikito y mi a siña conoce Hulanda, y compronde e cuadro den cua e estudio tabata tuma luga. Derecho ta algo cu por studia den buki, pero bo ta bib’e.”

Exactamente locual e mester aplica entrante prome di Januari 2022 como Presidente di Corte Comun. Despues di e estudio aki, Mauritsz de Kort a scoge pa sigui studia ley na Universidad di Leiden. De Kort a drenta abogacia na Corsou despues di su estudio na Leiden, pero despues di tres aña, el a evalua su futuro y asina el a ripara pa su mes, cu den e practica di ley, e mes tabata kier a tuma e decisionnan, en bes cu como abogado laga un huez determina. Asina el a bay pa su estudio di huez, esta e rio (rechter in opleiding). “Esey tabata e di dos parti di ambicion di carera.”

Bida regular

Mauritsz de Kort a traha como huez na Amsterdam y unabes e tabata sali di su oficina na Corte e tabata dirti den e ciudad. Esey ta mas dificil riba e islanan. “Na nos islanan, cada decision, di mi y di mi coleganan, bo ta mira e resultado riba caya. E resultadonan ta directo. Na mi bista, esey ta haci cu bo ta mas alerta, cu pianan mas firme den comunidad y consciente di efecto di bo decision riba comunidad. Esey den mi concepto ta trece cierto cautela cune. Kiermen, un huez riba e islanan ta mas cauteloso unda nan ta bay, cu ken nan ta anda y esey ta nifica cu mester di un seno di famia y amigo cu ta brinda un base fuerte, cu ta duna bo e confianza cu bo ta sinti bo mes sigur cu nan. Pa asina un huez tambe por desahoga, diberti y hari, pero den un structura di confianza. Por hiba un bida normal pero, simplemente bo ta mas cauteloso y cu ken.”

E hoben di Pos Chikito

Poco biaha ta tende algo di Pos Chikito na Aruba, cu excepcion di retonan cerca hobennan. Y de Kort ta bon consciente di esey. P’esey mes e kier bisa particularmente e hobennan di e bario, cu mester gara tur oportunidad cu educacion ta brinda. “Pa mi e tabata un trapi pa bay dilanti. No ta importante si ta scol di Pos Chikito, di Playa of San Nicolas. E simple hecho cu ta haya pa medio di enseñansa por mustra bo miho cualidadnan, haci uso di esey. No tur hende mester bira abogado, ni dokter, ni huez. Pero si bo por bira un bon carpinte, un bon lasdo, si esey ta bo habilidad, usa enseñansa como e anker pa futuro.”