E di dos batch cu 12.800 vacuna a yega Aruba diamars 9 di maart ultimo y ayera den oranan di atardi na Club Don Bosco di Noord, e mesun 12 personahe cu a haya e prome dosis dia 17 di februari ultimo, a haya e segundo dosis.
Bao estricto medidanan di seguridad di Cuerpo di Polis, Departamento di Salud Publico (DVG) y ademas di e presencia di minister di Salud Dangui Oduber, ayera atardi a tuma luga e segundo vacunacion di e personahenan conoci den comunidad cu ta cay bou grupo di risico.
Pa cu esaki, Jurette Croes PR di DVG a menciona cu tres siman despues di 17 di februari cu nan a haya e prome dosis di vacuna Pfizer, asina mes el a sigura cu den dos siman aproximadamente nan lo ta protegi pa un 25%, loke ta nifica cu si un di nan mes ta haya e malesa di Covid-19 e lo no hayel’e di un forma hopi grave.
Di su parti, minister Oduber a señala cu el a recorda cu 17 di februari nan a cuminsa cu e prome ronda di vacunacion, aworaki nan ta sinti gradici pa tur e respons cu ta wordo haya di comunidad di Aruba y esunnan cu ta registrando y conforma cu palabracionnan cu Gobierno Hulandes pa cada tres siman Aruba lo haya vacunanan, e di dos batch lo sigui vacuna esunnan cu ta cay den grupo di mas di 60 aña, e resto di dunadonan di cuido, esunnan cu ta biba den casnan di cuido.
Consecuentemente e grupo cu ta sigui ta esunnan cu tin entre 18 pa 60 aña cu tin un condicion fisico y despues nan ta bay pa e vacunacion masal di entre 18 pa 60 aña general, tocante esaki minister a manifesta cu ora nan ta caba cu e grupo di 60+ na luna di april nan lo sigui cu esunnan mas hoben.
Segun minister Oduber, RIVM y Gobierno Hulandes a bay di acuerdo pa na e momentonan aki caba lo amplia e posibilidad di entre esunnan cu tin 18 pa 60 aña cu tin un condicion fisico pa cuminsa vacuna prome, debi cu nan tambe ta wordo considera como grupo vulnerabel.
Asina mes, el a sigura cu nan ta vacuna e personanan cu ya caba a registra via e plataforma digital Aruba Health na unda el a informa cu e cifra di personanan cu a registra caba ta yegando na 30.000, e cantidad di persona cu ta vacuna pa dia ta 1.000 pero e liheresa di e proceso ta indica cu nan por aumenta e cifra te 1.600.
Tambe, el a expresa cu nan a haci e peticion pa Hulanda pa Aruba haya mas vacuna cu e obhetivo di por inmunisa mas hopi lo mas lihe posibel y cu Gobierno Hulandes a bay di acuerdo cu esey.
Di algun di e personanan cu a wordo vacuna riba 60 aña den ultimo tres siman, minister Oduber a declara cu nan a haya Covid-19 den ultimo dianan y tur di nan a bisa cu nan a hayel’e cu sintomanan ‘hopi leve’ y cu Covid-19 no a afecta nan den ningun sentido.
Di mesun manera, el a sigura cu tambe a cuminsa haci registracion pa vacuna na hotelnan, esaki ta trata di un cooperacion cu nan a haya entre ministerio di Turismo, Salud Publico y Deporte cu AHATA pa asina DVG asisti tur e hotel pa registra tur e trahado, “loke nos kier logra ta pa registra mas hopi hende pa asina nos por keda cla cu comunidad”, minister Oduber a bisa.
Diasabra awor di 13 di maart ta haci un aña cu e prome dos caso di Covid-19 a wordo registra na Aruba y e ta kere cu tur hende por a sinti e necesidad pa bay back na e normalidad y di esaki el a comenta cu “e vacuna aki ta e solucion pa mundo y tambe pa Aruba”.
Tin posibilidad cu Aruba por haya e vacuna di e compania farmaceutico Johnson&Johnson, minister Oduber a afirma cu aworaki nan tin un entendimento cu Gobierno Hulandes cu e prome cuater batch lo ta di Pfizer pero e di cinco probablemente, aunke ainda no tin confirmacion di esey, lo por haya esun di Johnson&Johnson cu ta un vacuna efectivo tambe, ta hopi mas facil pa warda logisticamente y ta trata di un solo shot.
Boticanan tambe a acerca gobierno caba pa expresa interes cu si nan por haya acceso na vacuna aki y cu nan mes dispuesto pa yuda tambe y pa duna e vacuna, “pa ta mas accesibel posibel pa tur hende por haya e vacuna aki” minister a sigura.
Ademas, el a trece dilanti cu na Merca ta vacuna dos miyon di hende aproximadamente pa dia, loke ta nifica algo positivo pa Aruba pa motibo cu mas lihe Merca caba di vacuna ta mas miho pa turismo di Aruba.
Den proyeccion cu tin pa luna di maart den comparacion cu januari y februari nan a mira un crecemento den turismo di casi 12.000 pasahero for di Merca y na luna aki nan tin proyecta pa yega rond di 43.000 turista, lo cual ta bon.
