Ayera, den oranan no specifica, e di dos preso peligroso den un periodo di 1 luna a huy for di KIA. Esaki ta despues cu Erick Arturo Minguel Junior Schneiders a huy, cual te ainda ta fugitivo. Awo Gerson Martina, naci na Corsou, tambe ta fugitivo.
Diadomingo ta habri cu un informacion for di KIA cu e preso Gerson Galsirio Martina di 38 aña naci na Corsou 13 di november 1980 a huy. No ta conoci con e por a huy ni e ora exacto cu el a haci esaki. E tabata falta 9 luna di condena. Ta pidi pa yama tipline 11141 cu cualkier informacion.
Segun un comunicado di Director di KIA, Gino Winklaar, na momento cu nan a haya e informacion a bay over na e procedura interno pa haya sa tur detaye di su huida y mesora a alerta tur partner manera CEA y tambe coordinadornan di KIA, a tuma contacto mesora cu Minister di Husticia, como tambe Cuerpo Policial, unda e Korpschef Interino a haya tur informacion.
E Director a menciona cu ta deber di KIA pa tene criminalnan condena den KIA, pero ta un deber colectivo di ful e pais pa logra haya nan ora nan logra sali afo. Pueblo por yama pa duna cualkier tip via e Tiplijn di Polis 11141. E Director ta duna alerta cu e fugitivo Gerson Martina ta un persona peligroso y mester tene cuenta cune, bisando pa ‘no bay haci nada bo mes, pasobra e ta un persona basta peligroso’.
E investigacion interno ta continua pa haya sa tur detaye con e persona aki a logra yega na su libertad. Manera cu ta cla cu tur informacion lo raporta esaki na autoridadnan concerni. Mester remarca cu cualkier ayudo brinda na dicho persona ta castigabel pa nos Codigo Penal. Articulo 2:146 ta papia si libera of yuda na liberacion di un persona cu tin castigo di prizon por haya castigo maximo di 4 aña di prizon.
Segun Hefe di CEA, Ronny Geerman, nan tin e trabou di ‘buiten schildwacht’ y durante un escape, CEA tambe ta hunto cu KIA den investigacion. Geerman ta pidi un biaha mas si tin cualkier informacion yama e tiplijn di Polis 11141 y tene cuenta cu Gerson Galsirio Martina ta un persona peligroso.
Di dos preso ta huy den 1 siman
Esaki ta e di dos preso cu ta logra scapa di KIA den un temporada cortico. Bon Dia lo ta puntrando Minister di Husticia, Andin Bikker (POR) si lo lansa un investigacion na KIA pa asina haya sa si esaki pa via di algo structural cu ta pasando den KIA. E helicopter no lo por yuda cu e buskeda aki pa un tempo, segun Minister di Husticia pasobra e ta den mantencion prescrito y den proceso di registracion di Colombia pa Aruba.
Na mesun momento, e piloto a haya su mes cu un biahe di emergencia, pero su partida tabata planea. Sinembargo, KIA, CEA y KPA ta trahando un plan di contingencia pa e captura y prevencion di futuro huida di cualkier detenido.
