Miles di studiante a subi caya rond di mundo pa un di dos protesta, demandando accion contra cambio climatico. Protesta ta inspira pa hoben di Suecia, Greta Thunberg, kende a papia cu lidernan di Nacionnan Uni durante e cumbre na New York.
Ayera a tuma accion na New Zealand, unda cu hoben a marcha na e parlamento di Wellington, teniendo e protesta mas largo eynan. Na Italia, mas di 100.000 a reuni na e capital Roma, unda cu manifestante tabatin pancarta di ‘cambia sistema, no e clima’ of e palabra ‘futuro’.
Marcha a tuma luga na 180 localidad na Italia. Minister di Educacion di Italia a bisa cu studiante cu ta na evento no lo wordo penalisa pa keda ausente di scol.
Miedo pa e impacto di keintamento global riba generacionnan hoben a lanta protestanan na India, Spaña, Portugal, Sucecia, Finlandia y Hulanda, un siman despues cu centenares di miles a rally mundialmente prome cu cumbre di ONU.
Na Berlin, activistanan di grupo Fridays for Future a enfrenta yobida persistente pa denuncia un pakete di medida cu gobierno Aleman recientemente e acorda pa disminui emision di gas di invernadero di e pais. Expertonan ta bisa cu e propuesta ta cay cortico di locual ta necesario si e pais #6 den emision lo alcansa su meta pa e acuerdo di Paris 2015.
Actor Javier Bardem a uni cu hobennan den demostracion di San Sebastian cu a tuma luga na Spaña. Bardem ta promoviendo un documentario cu el a traha cu GreenPeace.
Thunberg ta planeando pa atende protesta na Montreal. Na Wellington, Katherin Rivers, di 18 aña di edad y studiante di Universidad, a bisa cu ta bon pa mira hende hoben ta tumando accion y responsabilidad personal pa marcha.
“Nos mester stop cu e hende cu ta haciendo placa riba lomba di cambio climatico. E companianan di petroleo grandi, industria di producto di lechi. Nos mester trece cambio pa futuro. Thunberg a cuminsa su so, awo miyones di persona ta sigui su stap. E mester ta orguyoso di su mes”, el a bisa.
