Ayera mainta a tuma luga e prome dia di congreso pa Dialogo Tripartite Laboral. Den esaki, gremio sindical, gremio comercial y gobierno ta traha hunto riba documento pa trata ley ARBO, cu ta importante pa trahado y doño di trabou.
Minister presidente, Evelyn Wever-Croes (MEP) a expresa cu ta impactante y positivo ora e gremionan uni pa pone interes di pais Aruba dilanti, a pesar cu tin diferencia di opinion riba otro cosnan. E ley di ARBO ta un ley riba cual tin cas mas di 26 aña trahando.
Segun e mandatario, e ta birando un realidad a base di un modelo cu ta kere aden. “E ta un modelo dialoga y yega na algo tripartite tras di cual tur hende ta para. E ley di ARBO ta percura pa siguridad na pia di trabou.”
E ta percura pa bienestar di e trahado, e ta percura tambe pa tin un miho dialogo entre e doño di trabou y trahado. Unabes cu tin esey den su luga ‘lo logra cosnan grandi’. Esaki ta e ‘prome paso, prome resultado’ segun e ta splica.
Wever-Croes tambe ta duna di conoce cu dialogo ta bayendo den bon direccion. Esaki ta e di dos congreso pa yega na palabracion di cual ta e reglanan. “Nos tabatin e congreso cu a papia di ley y awe nan ta presenta un pa un cada artikel, pa cada hende por duna nan opinion.”
Den e ley nobo tin 30 articulo, pero e ta conta cu e sosten di tur tres gremio. E mandatario ta splica cu esey ta haci e proceso cu e tin cu bay parlamento mas facil. “Parlamento ta scucha partido y ora partido trece dilanti, parlamento ta tum’e na serio y por tarda e proceso; sinembargo, aki por mira e proceso ta avansa riba e parti ey.”
E ta comparti cu e ta un modelo unico y special, caminda e ta felicita su colega minister Glenbert Croes, y cada gremio. Cu e ley di ARBO ta bay tin siguridad y esey lo contribui na e bienestar social di pais Aruba. Tambe ta bisa cu esaki lo facilita pa trahado sa locual nan tin cu tene na mes na dje. Un decada nobo, caminda bienestar di trahado y doño di trabou ta na prome luga.
Minister Glenbert Croes ta anuncia cu e punto di prioridad cu nan a defini na comienso ta e reglamento di ordo ta cu nan ta bay traha cu otro. Nan ta enfoca riba con nan ta bay dialoga cu otro pa por tin e respet y tolerancia pa e diferente manera cu gremio ta trece dilanti pa henter e proceso.
Segun Cores, riba tur dos dialogo a pone cu tur hende por tin confiansa real den e dialogo. Pa cada gremio por tin e confiansa cu locual nan ta palabra di berdad wordo implementa.
E unico cu punto cu tabatin riba agenda di ayera tabata e ley di ARBO, cu ta regla e siguridad, bienestar y salud di tur trahado den sector priva y pa gobierno, ‘pa henter Aruba’ sin laga niun doño di trabou ni trahado afo.
Croes ta enfatisa cu esey ta bay crea un era nobo y un ambiente na trabou unda no tin ningun circunstancia cu por perhudica e trahado of doño di trabou. E ta remarca cu situacion asina por tin efecto negativo na trabou.
Condicion di siguridad y bienestar ta salvaguardia productividad laboral. No solamente aspecto di salario, peticion primario y secundario ta importante, pero tambe e trahado su animo na trabou
Un trahado ta duna mas di su banda ora su siguridad, bienestar y salud ta miho; productividad ta laboral ta bon, cual tin bon efecto riba nos comercio y economia.
