Armand Hessels:

Recientemente director di Asunto Social a bati alarma tocante e situacion social na Aruba. Segun e, Aruba ta den un crisis social serio pa motibo di e falta di maneho durante e ultimo 20 añanan.

Tin un lista cronico di espera di 1-2 aña, falta di personal y di luga safe pa cliente. Pero a pesar di e aumento substancial di problema, gobierno a economisa mas o menos 50% riba e presupuesto anual di e organisacionnan social durante e ultimo añanan.

Por mira mesun falta desesperacion di placa riba tereno di enseñansa. P’esey tambe Beatrixschool, Julianaschool y Colegio Frere Bonifacius tin basta aña cera como cu no tin placa pa reparacion. Pasobra ta malgasta esey na localidad di emergencia na unda awendia ta ricibi e alumnonan di e scolnan ey. Den tur departamento di gobierno, e falta cronico di placa ta hunga un papel limitativo importante.

Asina mes, e ultimo gabinete di AVP te na ultimo momento prome cu eleccion, a sigui presenta un imagen como si fuera nada serio tawata tuma luga. Segun e partido, Aruba lo por cumpli sin ningun problema na e exigencianan di CAft pa cu presupuesto. Nada tawata mas leu di berdad!

Citgo como solucion

Por destila masha facil mes for di e aventura cu Citgo con desespera e situacion financiero di Aruba ta durante e ultimo añanan. Pasobra,¿con mas por splica cu a pone e unico speransa pa e salbacion financiero di Aruba den ponemento den funcion di e masa di hero bieu tur frustia y ya caba completamente desprecia?Esaki a anula den tur sentido e principal slogan y proyecto di show internacional di gabinete di AVP, esta ‘un Aruba berde’! Hasta e Chinesnan, cu placa na granel pa cumpra e ultimo cos na tur caminda na mundo, a laga e refineria un banda, a pesar cu e ta un di e poco nan na mundo cu por refina e crudo diki Venezolano. Esey ta hopi remarcabel pasobra pa motibo di su problemanan ecologico serio, China tin un prohibicion pe mes refina e crudo aki, cu cual Venezuela ta paga su debenan enorme na China.

Pero nos gobierno tawata sa miho y a cuminsa negocia cu un compania di estado Venezolano di e pais cu ya caba,sin misericordia,a causa bancarota of problema financiero serio di varios empresa Arubano y Antiano (Tiara Air, Insel Air, Aruba Airlines, hunto cu cantidad di otro empresa di aviacion internacional). A cuminsa e prome negociacionnan cu un persona di cual tawatin basta duda. En berdad, poco despues husticia Mericano a sentencia e persona aki pa motibo di corupcion na gran escala. Asina mes a sigui negocia, awor cu reemplasante cu recientemente tambe a encarcela pa motibo di corupcion na gran escala. Nan a encabesa un empresa cu ta propiedad di e compania di estado cu ya caba pa basta aña no por cumpli debidamente na su obligacionnan y cu cada bes mas ta den problema mas serio. Atrobe, pa motibo di…corupcion na gran escala! Mientras cu e ultimo añanan internacionalmente ta critica e gobierno di e pais cu ta doño di e compania di estado concerni fuertemente pa motibo di e circunstancianan dictatorial y e corupcion endemico cu a hiba e pueblo di e pais mas rico di mundo na crudo, te na rand di morto pa motibo di hamber. Den e hendenan ey, e empresanan ey y e gobierno ey di e pais ey, e ultimo gabinete di AVP a hinca su mayor speransa pa salba Aruba di un abismo financiero!

Engaño di pueblo

Bou di e circunstancianan aki a spera di pueblo cu e lo sigui kere ciegamente den nan salbadonan di gobierno. Indudablemente nan tawatin solamente bon intencion pa nos. Pasobra durante e negociacionnan cu tur e ‘malvadonan Venezolano’, di mes nan tawata y/of a keda puramente moral di mente y nan a defende exclusivamente e interesnan di Aruba. Pues no!

Minimal por a duda di nan experticio di negoshi for di e echo cu varios di nan tambe tawata coresponsabel pa e fiasco cu e hedging di WEB. Esey a costa pueblo di Aruba innecesariamente mas o menos Afl. 300 miyon. Nan fayonan moral y riba tereno di negoshi tambe ta sali na cla for di e echo cu bou di tur e circunstancianan ariba menciona a firma un acuerdo ultra secreto pa supuestamente habri e refineria. E deal aki, den caso cu e ta faya ta pone un obligacion adicional di minimo Afl. 600 miyon riba lomba di pueblo, cu ya caba ta confronta un debe di biyones cu pago di interes gigantesco pa motibo di mal gobernacion durante decada.

Pues ta parce cu te cu recien, gobernante ainda ta sali for di e punto di bista cu realmente tur hende na Aruba ta completamente kens. Riba dje ta bira cada bes mas cla con leu nan ta dispuesto di bay pa gaña pueblo riba un escala asina grandi y cu consecuencia asina serio. E pregunta ta kico pueblo por haci pa proteha su mes contra actitud asina cu ta parce hasta criminal di parti di su gobierno.

Reflexion

Aunke e gobierno actual ta hunga bunita cu su promesanan pa cu bon gobernacion y integridad, mester warda si di berdad ta transforma e promesanan ey den accion efectivo. Esey ta depende grandemente di e presion di parti di ciudadano riba gobernante. Y por haci esey solamente si tin un bista completo di e manera con realmente a goberna Aruba y e consecuencianan. ¿Ta sigui considera e consecuencianan ey como inevitabel di nos politica di patronahe tradicional? Den caso afirmativo, nos ta sucumbi y ta sigui, manera semper, cu orden di dia cu ta bira cada bes mas desespera? Of nos ta cuminsa por fin na acepta cu tipo di gobernacion asina ta inaceptabel/criminal y pa nos no sigui comporta nos mes manera lamchi manso? E escogencia entre esakinan ta determina pa gran parti e solucionnan cu nos mes mester aporta pa nos problemanan actual.