Fundacion Respaldo, Stichting Hunto, Fundacion Anti Droga Aruba (FADA) y Healthy Lifestyle Center a anuncia e di cinco edicion di Gold Mine Walk and Run cu e aña aki lo enfoca ariba salud mental.
Directora di Fundacion Respaldo, Caroline Hart, a splica cu dia 10 di october ta e Dia Mundial di Salud Mental. El a remarca cu na Aruba e stakeholders envolvi cu salud mental ta haci uso di e luna aki pa trece extra informacion dilanti tocante salud mental, organisa eventonan relaciona na e tema cu por yuda e comunidad di Aruba compronde miho y ta mas envolvi y tene un bida mental mas saludable.
Den pasado Fundacion Respaldo hunto cu FADA y Stichting Hunto a yega di realisa diferente actividad caba pa pone enfoke riba e topico di salud di mental, entre otro “Let’s Art for Mental Health” y aña pasa a organisa e actividad “Let’s Plant for Mental Health.”
Hart a sigui splica cu e aña aki nan a mira importancia di movecion pa salud mental y a invita Healthy Lifestyle Center tambe pa forma parti di e evento aki, un proyecto cu e stakeholders ta realisa un pensando riba e comunidad di Aruba cu mester mas informacion tocante salud mental.
El a subraya cu movecion fisico no ta importante solamente pa mantene e curpa den forma, pero e tin tambe un gran beneficio pa salud mental. Na momento cu un persona haci esfuerso fisico e curpa ta produci endorfina, un substancia natural cu ta yuda e persona sinti mas feliz y ta libera stress.
“Movecion por yuda sinti menos ansiedad y depresion, dos di e problemanan mental mas comun den actualidad,” el a resalta.
Ademas di esaki, el a indica, movecion ta yuda un persona drumi miho y ora un persona drumi miho e mente ta bira mas cla, e por maneha problema y retonan tur dia cu mas facilidad. “E ta un manera natural di subi energia y mehora e estado di animo,” el a agrega.
Director di FADA, Romyko Winklaar, a enfatisa cu FADA ta apoya e iniciativanan aki grandemente pa asina trece conscientisacion pa loke ta trata e tema di salud mental, un tema cu den e ultimo añanan a bin ta crece y cu despues di pandemia a crece ainda mas.
“Nos como organisacion ta apoya locual ta e GGZ-instellingen pa e bunita trabou cu ta wordo eherce den e ultimo añanan aki,” el a destaca.
Director di Stichting Hunto, Dalgis Montalvo a expresa cu ta hopi bunita pa wak con e instancianan ta uni no solamente pa traha, pero tambe pa mustra na comunidad di Aruba e trabou cu e instancianan cu ta encarga di GGZ ta haci. “Esaki ta un muestra tambe cu nos kier e union tanto den e instancianan, pero tambe pa e comunidad sa cual ta e instancianan cu ta traha den e parti di GGZ,” el a resalta.
E Gold Mine Walk and Run tin diferente categoria cu por participa. E categoria di cinco kilometer ta pa tur persona riba 17 aña y lo sali for di Gold Mine. Adicional na esaki tin careda pa mucha y hoben. Pa hoben lo tin e careda e tres kilometer y e careda di 1.5 kilometer, y pa e muchanan tin e careda di 800, 400 y 200 meter.
Por ultimo, Hart a resalta cu movecion ta un gran herment pa salud mental. “E ta yuda relaha, pensa cla y tin un miho balans entre curpa y mente. No ta importa e tipo di movecion cu un persona haci, e importante ta pa keda activo y haci movecion parti di e bida rutinario,” el a enfatisa.
