Di berdad ta bay… Haci algo pa San Nicolas…?

Dos noticia tocante San Nicolas den nos edicionnan reciente a yama nos atencion. Un tabata positivo, e otro negativo. Un ta refleha e deseo di mehora e ciudad aki, di parti di e actual ministro encarga cu asunto economico y desaroyo sostenible; e otro ta mustra nos e negligencia gubernamental cu pa varios decada ta marca e actitud contra e lugar aki, refleha den e situacion actual di e Hulpbestuurskantoor. Nan ta dos banda contrario di e mesun asunto, e mesun lugar. Cu esey, nos ta bisando algo nobo, nos ta riparando cu algo ta cambia den sentido positivo? No, ainda no, en todo caso.

E topico San Nicolas tabata semper uno cu ta haya nos atencion, sigur den e Editorial aki. Esey no tin nada straño cune; e ta simplemente e parti menos desaroya, cu mas a subsisti den negligencia di varios gobierno, un tras di otro, sin cu un di nan tabata capaz di comprende y actua riba e cosnan cu e ciudad aki mester y merece pa por desaroya, mescos cu otro partinan di nos isla. Aparentemente e gran mayoria di e mandatarionan cu a atende asunto di San Nicolas, incluyendo esunnan cu tabata mustra orguyo pasobra nan lombrishi ta dera ey, nunca a yega na reconoce cu e lugar no debe nan nada, nan no mester fabor, nan mester di e atencion berdadero riba cual e lugar y su habitantenan tin derecho. Laga nos spera cu e atencion nobo di banda di e mandatario actual ya menciona, realmente lo cuminza un proceso di mehoracion cu ta haci un diferencia den bida di e habitantenan.

Sin embargo, pa haci esey ta necesario contempla cu cabez friu kico ta e situacion y kico por haci, y kico tin hopi tempo sin haci. Cu nos ta comprende, e actual ministro ta pone su vista na promer lugar riba e aspectonan di e ciudad unda por trece cambio. Esey ta bon y ta spera cu lo por logra algo tambe. Pero, ora nos ta papia di desaroyo sostenible, ta imposible pa contempla desaroyo urbano den centro di San Nicolas sin tuma na cuenta kico ta e plannan, realistico, pa desaroyo sostenible den henter e region. Y sin duda e promer preguntanan ta dirigi na e situacion di e ruman ohochi Siames di San Nicolas, e tereno enorme di e refineria, di cual nos no por haya claridad ta kico ta bay sucede. Con por tuma decision sensato pa San Nicolas, si no tin claridad riba futuro di e tereno ey? Nos ta bira mas preocupa ora nos tende e mandatario encarga cu energia comenta, cu el a atende e tema refineria den su encuentro cu e ministro Ecuatoriano encarga cu energia, lantando atrobe expectativa di rehabilita e refineria. Y a base di kico realmente e ministro aki ta kere cu tin e famoso 1% di posibilidad pa e monton di hero bieu ey habri atrobe? Lo ta interesante si como ciudadano bo por sigui un biaha un reunion di conseho di ministro, unda e ta informa su coleganan di su hazañanan relaciona cu e refineria. Lo tin un persona eyden pa pidie splica ta dicon ainda e ta kere den e tipo di locura aki, o por ta cu e ‘respet mutuo’ ta bay asina leu cu no ta bisa nada? En todo caso, ta importante pa cualkier gobierno, cu ta tuma su mes na serio y ta papia seriamente y cu conocimento di e tema desaroyo sostenible, pa conta Aruba ta kico ta bay haci na San Nicolas…

Banda di e asunto di e elementonan economico importante, di cual e refineria ta esun di mas peso, tin e problema grandi tambe di desaroyo urbano pa loke ta vivienda. E deterioro di mas di 40 aña a laga nos cu un ciudad yen di tereno bashi, banda di un cantidad di cas cu ta insalvable, cu e consecuencia cu mester bin un masterplan pa rehabilitacion di e ciudad, envez di keda emiti tereno di erfpacht rond di e ciudad te na limite di Parke Nacional. Porcierto mester bisa cu algun tempo pasa director di DIP a toca e tema aki, unda el a mustra riba e necesidad di rehabilita e casconan urbano di San Nicolas y Oranjestad, usando e terenonan bashi den ambos pa aloca vivienda. Palabranan sensato, cu sin embargo no a haya sikiera follow up di un solo silaba di cualkier ministro!

Nos mester a corda riba e asunto aki tambe den e dianan aki, unda un simple noticia di un otro isla den nos region a capta nos atencion. Dominica, cu un poco mas cu mitar di e poblacion di Aruba, a produci den ultimo 4 -5 aña dos mil vivienda pa nan hendenan di entrada mas modesto… Loke nos a mira na Aruba cu gobierno actual ta coopera pa traha vivienda bay halto pa hende cu entrada mes halto, den e area mas caro di Aruba… Vivienda popular, nowhere to be seen…

Awor, kico ta e problema fundamental di e asunto aki? E problema ta cu si bo kier show off cu desaroyo sostenible, pa cuminza bo mester tin plan general y integral, unda ta contempla debidamente tur aspecto y opcion. Esey no ta conta pa San Nicolas so, sino pa tur proyecto importante. Si no ta haci esey, anto loke nos ta mira ta un serie interminable di ‘roadshow’ individual, cu finalmente ningun ta carga fruto. Nos por mihor? Sigur, y ya cu ta papia di San Nicolas, ban cuminza ey, pero den serio.