Di berdad gobierno kier… Reforma gobernacion…?

Si nos analiza e opinion di e equipo Hulandes envolvi den implementacion di e Landspakket di Aruba, nan ta bastante satisfecho con cos ta bay te awor, cu excepcion di… e reforma fiscal. E reportahe ta pone bon cla cu ta gobierno di Aruba unilateralmente a tuma e decision pa pospone e introduccion di BTW cu tabata programa pa 1 di januari 2023, manera palabra anteriormente. E reportahe di e medio aki di e noticia ey, inmediatamente a haya un cantidad di reaccion rabia riba Facebook di algun elemento di e partido grandi den gobierno cu tabata trata di desmenti e asunto.

No ta nos custumber pa reacciona riba e tipo di critica aki, cu no ta basa riba nada sustancial, pero pa e biaha aki nos ta pone e texto, cu ta aparece den e reportahe di e Uitvoeringsagenda, textualmente manera e ta na Hulandes, pa no por bisa cu nos a manipula den e traduccion: “In de afgelopen drie maanden is er goede voortgang bereikt bij de meeste maatregelen uit het landspakket Aruba, met uitzondering van de hervormingen op het gebied van belastingen (thema C) waarvoor Aruba bestuurlijk heeft besloten om de geplande invoering van het nieuwe belastingstelsel niet meer door te zetten per 1 januari 2023. Dit besluit is eenzijdig genomen zonder overleg met of nadere toelichting aan de TWO, wat vraagt om politieke bijsturing.”

Redaccion di Bon Dia Aruba no a inventa nada, ni a floria e storia; e ta loke e responsablenen di e Tijdelijke Werkorganisatie a trece dilanti. Y pakico e paso aki? Pasobra e ta ehemplar pa e manera con e cooperacion entre gobierno di Aruba y esun di Hulanda ta bay: unda ta kere, di banda di Aruba, cu coopera na nivel di ambtenaar ta bon, esey ta tuma lugar y cu satisfaccion mutuo. E problemanan semper ta cuminza ora cos ta cuminza bay den direccion cu e politiconan na mando no gusta: ey ta unda cu cos ta tranca. Y ta hustamente e tema aki di reforma fiscal ta esun di cual hopi luna pasa nos a comenta cu na e manera di morocoy cu tabata anda cu e asunto di banda di gobierno di Aruba, tempo ta bira cortico pa por introduci e BTW proximo aña y cu gobierno no lo lamenta esey… Y pakico no ta lamenta? Pasobra no ta idea di e gobierno aki pa bin cu un BTW; si ta pa nan, nan no ta hacie mes. Ta Hulanda y IMF tin añanan largo ta ‘maha’ na cabez di gobierno(nan) di Aruba pa haci esaki, y tabata obvio cu a bay di acuerdo cu Hulanda pa pone esaki den e Landspakket, pero esey no ta implica cu lo ta bay tin implementacion tambe.

Loke tal vez e Hulandesnan mester siña ainda, cu no ta pasobra bo a pone algo riba papel y laga nan firma, anto esey ta garantia cu nan ta bay cumpli tambe. Ademas, papiando di e mesun tema di reforma fiscal aki, ta mas cu obvio tambe cu no ta laga sa nada mas di kico ta den preparacion. E asunto ta masha simple: bo no por pretende di ta haci un reforma fiscal y no ta duna ningun otro detaye di kico mas esaki ta encera. Pasobra ta dificil pa pretende cu e unico cos cu no ta bon den nos sistema fiscal ta e falta di un bon sistema di cobra impuesto indirecto. Tin hopi mas cos pa drecha pero di banda di gobierno ta trata esey como secreto, y di banda di otro parti interesa no ta bin ningun aporte pa mehoracion di otro aspecto di nos sistema cu nos por bien aboli. Pregunta: lo no ta na beneficio di sector priva completo si nos por haci un ‘opruiming’ den e desastre cu yama nos sistema di impuesto di importacion? Nos ta tende critica di nan banda? Algun sugerencia pa mehora? Nada.

Ta bon pa observa tambe cu esaki no ta e unico problema. E Hulandesnan ta señala otro mas cu probablemente tampoco lo haya solucion. Esey ta e problemanan cu nan ta mira pa loke ta cambia di planificacion pa implementacion, cu ta e capacidad di coordinacion y formacion di maneho di e aparato publico. Esey no ta straña nos nada, nos tin añanan largo ta mustra riba e problema aki: e contradiccion grandi cu gobierno ta biba aden. Y kico esey ta? Cu nos tin un aparato grandisimo pa un pais asina chikito, pero ora ta trata di trabao na nivel di maneho y coordinacion di implementacion, nos no tin e cuadronan experimenta cu nos tin mester pa por haci e trabao. Nos por wel di ta paga casi 8000 salario pa luna, pero esaki no ta garantia di trabao di calidad, al contrario. Y drecha algo, ta significa cuminza corta den e payroll enorme aki, pa crea espacio pa mehora implementacion cu e experticio necesario. Y esey ta politicamente ‘onverkoopbaar’…

Kico lo ta e scenario cu e Hulandesnan mes lo bay ripara? Cu tanten ta papia di traha plan, ta crea un ambiente ‘nice’ pa duna e impresion cu cos ta bayendo bon. Dia cu yega asina leu cu mester cuminza actua, cambia ley pa facilita deshaci di e parti innecesario di e aparato, anto nan lo ripara cu cos ta cuminza tranca. Nos no ta convenci cu di berdad gobierno ta desea di mehora gobernacion… We’ll see when we get there.