Recientemente nos ta tende cierto comentario contradictorio encuanto e supervision financiero di Reino cu lo mester haya concretizacion den un ley di Reino. Di banda di gobierno di Aruba y nan parlamentarionan nos por scucha cu, despues di e exito di deshaci di e propuesta di ley di COHO, ta purba logra kita for di mesa e ley di supervision financiero tambe. Esaki a sali na cla entre otro na e ultimo encuentro di e parlamentonan na Corsou. Tin motibo pa cual lo no ta asina facil pa pone ambos proyecto di ley den mesun categoria.

Esey tin tur cos di haci cu e forma con a yega na e dos propuestanan aki. Den e caso mas reciente di COHO, e crisis causa pa Covid-19, a trece cune mas emergencia financiero pa Aruba, mientras e situacion tabata grave caba. Den cuadro di e ayudo Hulandes a bin cu exigencia, y acuerdo, di cual e mandatario y parlamentarionan gubernamental a bisa despues cu ‘a pone cuchiu na nan garganta’. Pero, e partinan tabata colabora claramente den cuadro di articulo 38 di Statuut, cu ta duna base na e cooperacion mutuo den Reino. Y cooperacion mutuo ta solamente posible si ambos banda ta di acuerdo tocante e condicionnan di tal cooperacion. E formanan describi den Statuut ta – posiblemente – den forma di ley di Reino, logicamente di consenso, o ta opta pa loke yama ‘onderlinge samenwerking’; e mutuo consulta. Loke a cambia mientras tanto ta cu a bin un acuerdo nobo, a base di e obhecionnan di e islanan, cu no ta bay tin ley di Reino mas pa COHO, pero cu den comun acuerdo, bao di e mesun articulo 38 di Statuut, ta bay tin convenio cu cada isla pa loke ta nan Landspakket di reforma, di cual ambos banda ta bisa cu nan ta necesario.

Nos mester ta sorprendi anto cu awor ta bin e ponencia di parti di Aruba cu e proyecto di ley di supervision financiero di Reino tambe mester traha lugar pa un convenio segun e mesun articulo 38? No, pero e asunto no ta asina simple di reconoce similaridad y acto seguido cambia esaki tambe. E motibo pa no cana e mesun caminda ta cu e background di e ley di supervision financiero tabata totalmente diferente.
Hecho ta cu e intervencion den asunto financiero di gobierno di Aruba a cuminza na aña 2014 cu un Decreto Real (KB) a base di articulo 43 inciso 2 di Statuut, unda ta defini cu gobierno di Reino tin e responsabilidad di garantiza bon gobernacion (“deugdelijk bestuur”). Un aña despues di e hechonan di 2014 ainda no a bin un cambio manera gobierno Hulandes tabata considera necesario y nan a bin Aruba fin di april 2015 pa, manera ta bisa na Hulandes, “om spijkers met koppen te slaan”: caba cu e asunto ‘de una vez por todas’. E deliberacionnan lo a termina den un ley di Reino di supervision financiero, pero diferente cu e dos otro islanan (Curaçao y Sint Maarten) tin desde 2010 a base di consenso tocante e saneamento di e situacion financiero di e dos islanan, den e caso aki lo tabata trata di continuacion di e intervencion di Reino a base di articulo 43, inciso 2 di Statuut, si imposicion tabata e ultimo opcion.

Na momento cu gobierno di Aruba di e tempo ey a mira cu no tabatin opcion mas pa evita e supervision, a propone pa hinca e texto di e ley di supervision di Reino (di e otro dos islanan) den un ley di Aruba mes, pa sikiera aparenta cu gobierno di Aruba a keda cu rienda den man. Hulanda a bay di acuerdo y e ley di Aruba, cu su base huridico mancaron, a funciona pa algun aña, te cu na 2018 bao di e actual gobierno a yega na e protocol pa haci cierto cambio den e ley. Despues e sabotahe di e ley aki den parlamento pa fraccion di e partido grandi den gobierno a conduci na intervencion Hulandes, obligando gobierno di Aruba pa benta e ley local, cu e cambionan no acorda cu Hulanda, den prullenbak y sigui colabora cu e supervision bao di e ley original plus e protocol. Gobierno di Aruba por a rasca diente pero te awe ta obliga pa reconoce e legitimidad di e cuadro legal sustenta pa e ley original hunto cu e protocol. Aki a surgi e propuesta di un ley di Reino, bao di articulo 38, es decir di consenso, pero den background cu menaza di implementacion di un ley bao articulo 43, si no tin cumplimento.

Back na realidad di awe, por observa un ‘impasse’ unda parlamento na Hulanda a cuminza perde pasenshi cu tanto gobierno di Aruba como e secretario di estado, encuanto e falta di continuacion di e trabao pa yega na e ley di Reino. Berdad ta cu e comentario y preguntanan di Tweede Kamer y di Aruba no a haya contesta ainda di secretario di estado, pero esey pasobra no tin un acuerdo cu gobierno di Aruba ainda cu e secretario por hiba na su parlamento. Pues e trancamento ta atrobe na Aruba, y Hulanda, mustrando riba e concordancia deseable den legislacion di e islanan, no lo permiti cu Aruba ta keda sin supervision financiero. Aruba por scoge ainda: colabora pa e ley di consenso, bao di articulo 38, o sigui teima te ora nan hay’e via articulo 43. Esaki ta e ambiente propicio pa negocia nos debe cu Hulanda?