Diaranson 20 di juli tawata un dia hopi extenso pa loke ta trata e reunionnan cu stakeholders en cuadro cu formacion di Gabinete Wever-Croes II. Riba e tereno di medio ambiente, Roland Croes di Serlimar tawata presente na unda cu a papia riba e compania mes pasobra manera cu ta conoci Serlimar ta den surseance van betaling.
El a wordo poni bou un tipo di curatela financiero aña pasa na mei door di e minister anterior di medio ambiente. Tawata importante pa sa con ta para awo cu Serlimar pasobra no lo kier mira un compania estatal bay bancarota. E reunion cu Serlimar a duna un miho bista di e situacion di e compania.
Prome Minister Evelyn Wever-Croes a duna di conoce cu e situacion ta keda hopi critico sinembargo den e ultimo lunanan aki Serlimar a logra mira avansenan si den e tema financiero y organisatorio pero no ta sigur cu esaki ta suficiente ainda pa por scapa e compania di bati bancarota.
“E reunion cu Serlimar tawata riba e area laboral, comercio, salud y medio ambiente. E meta na final di dia ta pa nos scucha kico ta locual ta importante pa e organisacionnan aki pa nos tene cuenta cu ne den e acuerdo di gobernacion cu nos ta trahando riba dje. Manera mi a splica diabierna, e acuerdo di gobernacion ta e prome stap, e di dos stap ta pa reparti e ministerionan entre RAIZ cu MEP y despues nos ta bay na e di tres stap pa apunta ministernan pa e diferente carteranan y cuminsa e procedura di screening.
Serlimar ta un compania cu hopi reto, haciendo su maximo esfuerso pa rescata e compania. Presente tabata director interino sra. Lacle, bewindvoerder sr. Rep y miembro di hunta di supervision sr. Croes. Di banda di formacion di Gabinete Wever-Croes II tabata presente Glenbert F Croes, Carlos Guiamo, Ursell Arends, Geoffrey Wever, Endy Croes, Rocco Tjon, Hendrik Tevreden y Formador Evelyn Wever-Croes.
