Pa 3or di atardi di dia 3 di november, Cas di Cultura ta bay habri su portanan unda librerianan ta bay ta presente y pa 4or e show mes di e festival cu e tema di e aña aki “Dushi Cabesura” lo cuminsa.
Den cuadro aki, Biblioteca Nacional Aruba a informa cu Escritora di buki pa mucha Liliana Erasmus a skirbi un buki pa tur mucha na Aruba y Danielle Schothorst a ilustra esaki masha bunita mes. Un buki unico, dibertido y yen di aventura cu ta surpasa tur expectativa cu ‘Aza y e portanan magico’.
Esaki ta buki pa tur mucha na Aruba pa motibo cu e ta skirbi na Papiamento y Hulandes. Biblioteca Nacional Aruba ta presenta e buki aki cu orguyo y alegria caminda ‘Aza y e portanan magico’ ta un produccion den cuadro di e Festival di buki pa mucha’, edicion 2024 y a keda publica pa Levendig Uitgever.
Liliana Erasmus tin un pasion grandi pa skirbimento. E ta, entre otro, escritora di buki pa mucha y contado di storia y uno hopi creativo. Biblioteca tin tur Liliana su bukinan pa e lesadornan chikito. Liliana ta activo riba tereno di promocion di lesamento bou mucha.
Danielle Schothorst a studia arte visual y ta skirbi y ilustra buki pa mucha. Danielle ta bin Aruba pa e Festival di Buki pa Mucha pa hunto cu Liliana presenta e buki nobo.
Scolnan participante ta ricibi e buki como regalo y tur cliente di libreria ta haya e buki aki gratis cu compra di 25 florin, tanten cu tin. Por haya e buki gratis na tur libreria ora cumpra un buki pa mucha, tanten cu tin.
Biblioteca ta organisa e Festival di Buki pa Mucha pa stimula tur mucha na Aruba pa lesa. Y biblioteca ta invita tur mucha na Aruba pa bira miembro y asina lesa hopi mas buki. Pa stimula lesamento poco mas, miembresia pa mucha y hoben ta completamente gratis.
