Di 24 caso di abuso y maltrato cu yega hospital, 80% ta incest

Departamento di Asunto Social a comparti con nan ta premira 2020 pa locual ta trata Social Crisis Plan. Tambe a duna un update di aña 2019, cu mas cu 90% di proyecto ta den ehecucion.

Director Glenda Hernandez a duna di conoce tin 31 proyecto cu ta siendo ehecuta y esey ta e prome stap cu nan a cuminsa. Social Crisis Plan ta pa pone e base na ordo, mirando cu esey no tabata e caso. Segun Hernandez a bisa, tabatin un ‘forma di crisis profesional andando’. Un ehempel cu el a menciona ta e subsidio riba e tereno social, cu a bay di 122 miyon pa 50 miyon den algun tempo.

E ta bisa cu mientras e organisacion a bay atras, e poblacion a redobla. “Nos ta mira cu nos servicio social no a crece conhuntamente cu e poblacion. Nos a bay di 60.000 persona di aña 1990 y pa aña 2010 a bay na 110.000; sinembargo unda e servicio social a keda?”

Hernandez a cu poblacion lo sigui crece, mirando cu industria hotelero ta sigui crece y lo importa hende di afo. E ta remarca cu no tur hende di afo ta trece criminalidad, pero ta laga persona sin trabou di barionan cu problema social.

Pa e motibo aki por ripara e mesun fout ta andando. Mester bin cu un maneho pa preveni, mirando cu cada persona cu bin pa traha den sector hotelero ta trece acerca 3 of 5 persona den e famia cu mester vivienda, placa pa nan cartera y esey ta rekeri tambe servicio social.

Si e departamento di servicio social no ta crece kico ta haya? Hernandez ta contesta cu ta haya cu ta bira un situacion cu ta trece stress y confrontacion cune. “Ora nos a cuminsa cu Social Crisis Plan na november 2018, a mira cu servicio no tabata na su luga. Nos a bisa Departamento di Recurso Humado cu DAS a perde 25 profesional, di nan 12 trahado a bin bek.” DAS no ta e unico departmento cu e perde trahado, pero Voogdijraad tambe a perde y ‘masha tiki a bin bek’.

A puntra Hernandez con por duna servicio na bon nivel mirando cu no tin trahado pa atende cu e problema. E ta bisa cu pa 2019 a pone ordo den e departamento, awo cu e prome dos luna di 2020 mayoria ta poni den ordo y a haya e personal. Tambe personal ta ricibiendo training di ‘signs of safety’, caminda 160 persona a ricibi e training.

Segun Hernandez ta bisa cu esey ta importante pa motibo cu ora un mucha ta insigur, un persona cu training ta trata compromete henter e famia y ambiente di mucha pa traha un plan cu ta sigur pa e mucha.

Ta papia di 4 sector, e sector huridico, social, salud publico y educacion ta esunnan cu a haya training y ainda 130 otro profesional lo ricibi training. Tambe nan lo cuminsa cu codigo civil cu lo bin den vigor.

A papia cu diferente departamento di ambulance, dokter, specialista, maestronan di scol y esunnan riba tereno social pa bisa cu lo bay tin codigo caminda por detecta cu e mucha ta wordo abusa of maltrata. E meta di e codigo ta pa proteccion hubenil/infantil.

Lo tin diferente stap, manera con ta reconoce un abuso? Kico pa haci ora reconoce un señal di abuso of maltrato? E persona por papia cu colega ora ripara cu algo ta robes cu mucha – manera plekinan. Tambe por papia cu mayornan, por puntra of bisa kico a ripara di e mucha y kico ta pasando, sea algun malesa of circunstancia medico. Asina lo tin algun otro stap con pa actua.

Nan ta purba pone e profesional na altura pa nan actua. Hernandez ta comparti cu pa hopi aña, esey no tabata pasa. E ta bisa cu antes tabata sconde of no mag comparti informacion di mucha cu colega, sinembargo, ‘awo ta bisa actua riba dje’; ley ta bisa tin cu actua.

Si wak algo den e mucha/ hoben, tin cu actua. “Pa es motibo a trata pa haci e codigo prome cu e ley drenta na vigor na mei di e aña aki. Esey ta intencion pa e ley, pa asina tin profesional cu por sa kico pa haci ora un situacion presenta.”

Hernandez ta duna di conoce cu pa e aña aki hopi cosnan ta bay sucede como ‘one stop shop’. Esey ta nifica cu persona cu ta confronta cu violencia, caso di abuso, mucha cu a wordo abusa fisica- of sexualmente por wordo atendi na un solo luga.

Tambe el e comparti cu pa luna tin 25 caso severo cu ta yega na hospital pa violencia y maltrato. Segun Hernandez, psikiatra a bisa cu hopi di nan ta caso di incest. Tambe cuerpo policial a mira e cantidad di caso di violencia den cas, cual ta 150 caso, ‘esey ta den low season’.

Den temporada di carnaval tin entre 300 pa 350 caso sea den cas of riba caya. “Nos tin un nivel halto (di violencia) den nos comunidad. E meta ta pa combati e crisis social aki – y pobresa no ta cay den esey. Mi kier a laga cla.”

Social Crisis Plan ta pa combati violencia y mas tanto bou di mucha y hoben. Pa sociedad por combati e nivel di violencia cu tin. Pa profesional por duna ayudo y trece cambio den e servicio.

Motibo di e ‘one stop shop’ ta pa tin un solo departamento unda ta duna e calidad di servicio mas halto; ‘un postbode’ unda tur papel ta keda un caminda y ta wordo atendi na un solo luga ‘manera debe ser’.

A puntra Hernandez si e casonan cu ta yega hospital ta esunnan cu ta keda mescos of ta keda cambia. El a contesta cu no por bisa; sinembargo e ta bisa cu 80% ta incest, agregando cu mester bin un investigacion.

Tambe a menciona cu tin un investogacion andando caminda a bisa cu 68 mucha di scol secundario na San Nicolas cu duna cla cu 67% ta muchanan cu a wordo abusa di golpi. “E ta un cifra halto, 7 di 10 mucha ta wordo dal na cas violentamente, 42 mucha neglisha y 20% ta wordo abusa sexualmente.”

Segun Hernandez ta bisa cu ta algo grave pa un isla y un solo scol cu a duna resultado aki y por imahgina na tur e otro scolnan di Aruba ‘no ta aisna cu nos ta bay drecha tur cos’ pero si tin yiu, mayornan tin cu zorg pa e siguridad di muchanan.

Nan meta ta pa yuda tene e mucha/hoben saludabel, sinembargo no por haci tur cos ‘abo como mayor a escohe pa haya yiu’. “Nos di gobierno ta sostene mayor ora cu wak cu mester, tambe gobierno por takeover un mucha ora cu e problema ta grave y no ta wordo yuda”, el a bisa.