Mas keho ta drentando keto bay na Departamento di Asunto di Consumidor (DHC) di personanan cu a wordo estafa door di agencia di biahe Mas Destino, situa na Kini Kini building. Asina e vocero y hurista di e departamento aki, Amanda Maduro a declara na Bon Dia Aruba, pa asina pone tur consumidor alerta riba e benta di ticket aereo ficticio di parti di e agencia di biahe aki.

Mas denuncia
Sra. Maduro a laga sa cu despues cu el a bin cu informacion den e matutino aki riba e caso di estafa, mas keho a drenta. E hendenan perhudica ta na haltura cu via e instancia aki nan por haci nan denuncia y haya conseho huridico contra e tipo di abuso aki. Nan a haya diferente casonan tambe di hendenan cu nan a wordo avisa door di e compania aereo Pawa.

Nan tin aworaki cinco persona cu a bay haci denuncia y cada un di e personanan aki ta encera mas cu un ticket. Ta asina cu cada un di e personanan aki a reserva por lo menos dos te cu cinco ticket riba nan nomber, el a declara. “Nan ta hendenan cu a wordo perhudica di e manera aki. Nos ta bezig cu e caso”, el a bisa.

Sra. Maduro a laga sa cu departamento di Asunto di Consumidor a tuma contacto diferente biaha cu e persona cu ta maneha e agencia di biahe Mas Destino y semper nan ta haya un excuus diferente.

Cada biaha e ta bisa cu e problema ta den otro caminda, ya cu supuestamente nan mes a cumpra e ticketnan via un otro compania, ‘Xtreme Travel’ di Merca. Pero e departamento aki ta para ariba cu den nos ley e persona aki di e agencia di biahe Mas Destino mester para responsabel directamente pa daño y perhuicio y cu mester stop di bende ticket falso. Pero e contesta cu nan ta haya di e manager di e agencia di biahe ta cu e banco ta poniendo problema pa e por tin acceso na e placa pa duna e hendenan perhudica bek. Tambe e persona aki ta acusa Pawa di tuma e placa ora cu el a reserva e ticketnan y despues ta resulta cu esaki no a wordo haci. Ultimo cos cu e departamento aki a haya sa ta cu e persona aki supuestamente ta malo den hospital.

“Cada bes e splicacion di su banda ta keda cambia y esaki ta haci cu ta hopi dificil pa haya cooperacion di su banda”, sra. Maduro a bisa.

Acto contra ley
E departamento aki ta tratando di haya un manera pa cera e negoshi aki, ya cu nan ta cometiendo un acto contra ley di bende ticket ficticio. Directamente nan no por cera e negoshi pero si nan a tuma contacto cu Camara di Comercio (KvK) y departamento di Asunto Economico cu ta esun cu tin e autoridad pa hala aden e permiso di operacion di e agencia di biahe Mas Destino. Nan ta evaluando e caso pa asina bin cu un control pa wak si nan operacion comercial ta cuadra di locual nan mester cumpli pa nan tin e licencia. Nan mes no por cera e negoshi pero mester ayudo di polis pa duna asistencia den e caso aki.

DHC ta habri pa brinda asistencia y conseho legal pa e consumidor cu a wordo gaña cu e compra di nan ticket aereo. Tambe nan por yuda traha carta oficial pa manda pa e persona(nan) y instancia concerni, sra. Maduro a bisa.

El a conseha cada persona perhudica pa e agencia Mas Destino pa haci denuncia na departamento di recherche. Ya caba algun di nan a sigui e conseho aki. E siguiente paso lo ta e caso penal di parti di e grupo di consumidor estafa cu lo keda den man di recherche y Ministerio Publico (OM) pa asisti den e caso aki.

Accion colectivo
E hurista aki di departamento di Asunto di Consumidor ta lamenta cu como departamento di gobierno, nan no tin e instrumentonan legal y tampoco e leynan no tin e djente pa defende directamente e consumidor contra un caso di abuso asina.

Sra. Maduro a trece como ehempel cu na Hulanda ta existi e posibilidad di bin un accion colectivo di e diferente victimanan di un caso cu tin di haber cu companianan cu a perhudica nan. E ley na Hulanda ta brinda e posibilidad cu enbes cu cada persona ta lanta un caso civil contra e compania pa haya nan derecho, nan por bin hunto pa lanta un caso. Esaki ta permiti cu e costo di lanta un caso ta keda mas abou ya cu e ta wordo parti entre tur e personanan perhudica. Na Aruba nos tin e posibilidad ey, pero e ley ta bisa cu esaki ta wordo haci solamente si tin un fundacion. Pero considerando cu nan ta un departamento di gobierno, esaki no ta posibel.

Sinembargo na Aruba nos tin fundacion Consumidor Arubano Solidario (CAS), cu tin su propio statuto como stichting y e por fungi como representante legal pa proteha derecho di consumido. Den e caso aki e ta haya cu e personanan estafa pa e agencia di biahe Mas Destino por lanta un accion colectivo den corte via fundacion CAS cu actualmente ta pasando den un proceso di restructuracion.

Otro posibilidad cu e hurista aki ta purba wak ta esun via di un caso penal. Den e caso aki eventualmente tur e victimanan di estafa por wordo añadi na e caso di daño y perhuicio. Pero mester tene cuenta cu un caso penal ta tarda basta tempo, e por tarda un te hasta dos aña prome cu e caso bay dilanti. “Esaki ta diferente desafio cu nos tin cu e caso aki”, el a bisa.