(AP)—Devotonan Catolico a cuminsa bishita e graf di Papa Francisco diadomingo, parando den rij pa asina acerca e graf blanco na Santa Maria Maggiore un dia despues cu a despedi di dje pa e lidernan di mundo y un audiencia di shen miles hende.
Un solo rosa blanco a ser poni riba e graf cu a bisa “Franciscus”—e nomber Latin di e Papa. Un luz a lombra riba e graf y un reproduccion di e di e cruz pectoral di e pontifice difunto colga na e muraya riba dje.
Rosario Correale di Salerno, Italia, a bisa cu el a experencia “gran emocion” pa mira e sitio di descanso di e Papa. “Mi ta mira cu tur hende ta emocional,” Correale a bisa. “Di berdad el a laga atras un impacto grandi riba nos.”
Mas despues den dia, un grupo di cardinalnan a yega den bus y a drenta via e portanan di misa pa duna homenahe na Francisco na su graf, y pa un servicio di atardi. A habri e graf riba e segundo di nuebe dia di luto oficial pa e Papa, despues di cual lo tene un conclave pa asina eligi e proximo Papa.
“Papa Francisco pa mi tabata un inspiracion, un guia,” segun Elias Caravalhal. Caravalhal ta biba na Roma, pero no por a duna su condolencia na Francisco ora su curpa tabata na San Pedro Basilica despues di su morto dialuna di Pasco na edad di 88 aña. El a bisa cu el a bishita e graf di e Papa pa “bis’e danki pa loke el a haci.”
Tambe a celebra un servicio di misa special na St. Peter’s Square diadomingo pa Cardinal Pietro Parolin, cual te recien ta e secretario di estado di e Vaticano. Parolin ta considera e posible candidato pa bira e siguiente Papa pa via di su prominencia den e herarkia Catolico.
“E pastor cual nos Señor a duna na su pueblo, Papa Francisco, a termina su bida terenal y a laga nos,” Parolin a bisa den un homilia, duna riba e prome diadomingo despues di Pasco. “E duele pa su retiro, e sentido di tristesa cu ta yena nos, e tumulto cu nos ta sinti den nos curason, e sentido di confusion: Nos ta experenciando tur esaki, manera e apostelnan a haci ora Hesus a muri.”
E servicio di misa a ser asisti pa un audiencia di casi 200.000 hende, entre nan hopi hende hoben cu originalmente a bin pa Roma pa loke mester di ta e canonisacion di e prome santo milenial, esta Carlo Acutis, durante dianan santo dedica na hobennan. Hopi grupo hubenil, algun den uniformnan di scouting, a asisti na e entiero di Papa Francisco diasabra y atrobe a yena St. Peter’s Square diadomingo.
No a duna un fecha ainda pa e conclave, pero ta anticipa cu esaki lo cuminsa entre 5 y 10 di mei. Cardinalnan cu a biaha pa Roma pa e entiero di Francisco lo reuni regularmente e siman aki prome cu e conclave mientras nan ta cuminsa traha un caminda pa dilanti pa e Misa Catolico.
Francisco mes a scoge e sitio di descanso aki na Santa Maria Maggiore, cerca di un icono di e Madonna cu el a gaba, pasobra e ta refleha su bida “humilde, simple y esencial”, e arsobispo cu a administra e basilica a bisa diabierna.
“Pa por a mira e Papa y su graf awe, e tabata algo hopi bunita,” segun Amaya Morris, un turista di Los Angeles. “Mi a pensa cu ta increible cu e kier a descansa den e basilica aki. Di tur cu tin, el a scoge pa esaki.”
E entiero di e Papa tambe a mira algun cara conoci, entre nan varios lider politico, manera premier Giorgia Meloni, prome minister Hulandes Dick Schoof, presidente Frances Emmanuel Macron, presidente Mericano Donald Trump, ex-presidente Mericano Joe Biden, presidente Ucraniano Volodymyr Zelenskyy, Prins William di Inglatera, presidente di comision Europeo Ursula von der Leyen, y varios pareha Real di Noruega, Spaña, Monaco, Suecia.
