Polis ta traha riba un investigacion, y asina haya sa ken ta e hende responsabel di e suceso cu a tuma lugar na un disco na San Pedro, na departamento di “Valle del Cauca”, Colombia. Algun hende cu a keda afecta a papia tocante e momento di miedo cu nan a pasa aden.
“Esey tabata un boroto direpente, nos a keda bon y hopi hende a sali herida. Basta hende tabata grita y pidi auxilio”, Mario Fernando Bravo, ciudadano cu a resulta herida, a splica.
Tur 37 persona cu a keda lesiona pa explosion di e granat a ser hiba pa hospital San José de Buga, caminda nan a haya atencion medico.
“Dos pashent a ser opera y awor ta den recuperacion, dos mas di nan ta den unidad di cuido intensivo y nan estado ta stabiel. Dos pacient mas a ser hiba na otro hospital pasobra nan a registra un problema na nan ader, César Augusto Rodríguez, medico di hospital San José de Buga a informa.
Autoridad ta investiga e situacion na e discoteca. “Nos ta traha den proceso di entrevista pa asina haya sa testimonio di hende cu tabata eyden. E doño di e lugar a bisa cu nan no a haya ningun menasa ni extorsion” Alvaro Cardoso, coronel di polis di “Valle del Cauca” a splica.
Na e lugar a yega alcalde di San Pedro, gobernador di departamento y coronel di Polis pa asina reuni y consulta tocante topico di seguridad den municipio. Autoridadnan a dicidi ofrece un recompensa di 10 miyon peso pa e persona cu por duna informacion tocante autor di e suceso cu a tuma lugar diadomingo marduga na Valle del Cauca.
