Dia 15 september, redactor di Bon Dia Aruba a ricibi informacion cu dos detenido den Guarda Nos Costa (GNC) a wordo isola y tabata nengando nan derechonan fundamental mas basico cu ta baña, bebe awa y tampoco nan no mag di skeiro djente, pa motibo cu nan a wordo castiga pa un incidente cu candela cu a tuma luga dianan prome.
Mirando e situacion delicado, redactor di Bon Dia Aruba mediante un e-mail dirigi na minister presidente Evelyn Wever-Croes y tambe na minister di Husticia Rocco Tjon a informa nan tocante un situacion di presunto tortura na instalacion di GNC.
Constitucion di Aruba y tratadonan internacional manera EVRM articulo 3 ta prohibi tortura y trato na un persona den un forma degradante: “Het verbod van folteringen en van onmenselijke of vernederende behandelingen of bestraffingen.”
Manera Bon Dia Aruba ta bin denunciando for di algun luna pasa, ayera detenidonan di Guarda Nos Costa a graba un video den cual nan a splica mediante un comunicado dirigi na instancianan gubernamental e situacion cu nan ta bibando den instalacionnan di e centro di detencion aki.
Den un video di dos minuut publica pa otro medio di comunicacion local, un detenido – cu no a duna su nomber y a tapa su cara – a señala cu “nos cu ta deteni den instalacionnan aki kier saca na luz publico e inhusticia y violacion di derechonan humano cu nos ta bibando akiden”. “Tambe nos ta corrobora e hechonan publica pa e corant Bon Dia Aruba dia 16 di october di e aña aki. Nos kier bisa na henter Aruba cu tur esey ta berdad, cuminsando cu e situacion di e ciudadano Venezolano Maykol Chavez cu a wordo agredi pa cuatro funcionarionan di Guarda Nos Costa akiden, hasta cu casi el a perde e conocemento. E situacion di un candela unda dos ciudadano Venezolano detenido cu a wordo aisla pa 9 dia den un trailer den isolacion, si laba nan djente, sin baña, sin nan articulonan personal y sin clechi pa drumi tambe ta berdad. E ciudadanonan aki a wordo saca for di isolacion danki na e control medico cu a ripara e deshidratacion”, el a continua. “Tambe nos kier destaca cu akinan e 80% di e detenidonan tin mas di dos luna priva di libertad solamente pa no tin nan papelnan. Señores Gobierno di Aruba no tin placa pa manda tur e hendenan aki, akiden tin hende cu tin casonan den Dimas, pidiendo pa firma liber. Ta personanan cu a biba henter nan bida akinan, cu nan ta bringando pa mas di cinco permiso y ainda asina nan ta priva di libertad. Esaki ta un yamado na Gobierno Arubiano pa resolve e casonan di un miho manera. Si gobierno no tin placa pa paga nan mesun trahadonan, e ora ey laga nos sali cu un medida of cu un garante, pa asina nos por resolve e manera pa nos bay back na nos pais. Nos ta haci e video aki pasobra for di awe nos no sa kico por pasa cu nos, nos ta prefera keda anonimo”, e persona a bisa.
Despues cu e video aki a wordo publica, Bon dia Aruba a haci algun pregunta na Ministerio Publico, na minister presidente Evelyn Wever-Croes y na su excelencia Sr. Gobernador mirando e tratadonan di EVRM, entre otro articulo 3 cu segun e statuut di Reino Hulandes articulo 43 inciso 1 ta indica cu cada pais ta “garantisa” derecho humano, libertad fundamental y un bon gobernacion. Inciso 2 ta bisa garantisa, libertad y seguridad huridico ta un asunto di reino. Te ciere di edicion aki, Bon Dia Aruba no a haya contesta.
