Minister di HusticiaArthur Dowers a señala noticia unda supuestamente el a firma pa e delincuente cera den KIA,  Johaness Ospina Span por haya verlof pa bay disfruta di Valentine’s Day den su cas. E ta reacciona cu esaki no ta berdad. 

“Ami no tin autoridad pa tene sr. Ospina Span cera pa resto di su bida. Mescos cu mi no tin autoridad pa tene mayoria of niun otro criminal pa e resto di su bida cera.”

Tambe el aclaria cu sr. Ospina Span no a haya verlof pa bay celebra Valentine’s Day, sino cu tanto siman prome cu el a pidi  a cay casualmente riba e fecha special aki. Pero no ta asina –segun e mandatario- cu el a hay’e pa Valentine’s Day. “Pasobra ora cu bo ta cera, segun mi, tur dia bo sali for di prizon ta Valentine’s Day pa bo.” El a splica cu den sistema legal ta para cu ora cu persona a sinta cierto cantidad di tempo, e por bin  na remarca pa haya un verlof. E mandatario a declara cu e prome biaha cu Ospina a haya verlof, el a firme; pero e di dos biaha si e no a firme, sino cu director di KIA a haci’e. Den e caso aki e prome verlof semper ta autorisa pa minister di Husticia mes.

Dunamento di verlof
E mandatario a bisa cu den ley ta para cu verlof pa e prizonero ta posibel, pero awor nan kier haci politica cu e asunto aki. Minister Dowers a indica cu e dunamento di verlof ta un proceso ‘masha serio’ caminda Ministerio Publico (OM), prizon y Reclassering ta envolvi tambe. El a bisa cu sr. Ospina Span a comporta su mes den prizon bao e condicion cu ta wordo stipula pa e por haya verlof; ya cu esaki ta contempla tambe den e proceso di rehabilitacion. Esaki ta controla pa un team special cu ta bishita den antemano e sitio unda e detenido ta bay durante su verlof caminda e mester t’ey. Si nan ta bin constata cu e persona no t’ey; y no a cumpli cu e rekisito stipula, e por haya e chens di no haya mas verlof y e posibilidad di perde e reduccion di un tercera parti di su castigo.

E prizonero su derecho
Minister Dowers a bisa cu si den caso nan ta nenga sr. Ospina Span su verlof, e por bay hues pa su derecho. Masha poco mes ora cu ta wordo nenga un verlof, hues ta bay di acuerdo cu e decision aki, a pesar cu nan por ta bon argumenta. “Ora cu nos ta nenga, nos ta nenga argumenta. E por ta un hende cu no ta comporta su mes. Un hende cu tin risico.”

E mandatario a agrega cu un biaha el a nenga un verlof di un persona cu a mishi cu un mucha; ya cu a bin resulta cu no a informa e victima ni su famia. E mandatario a bay den pasado bisando cu sr.Ospina Span a wordo deteni pa comete acto criminal y cruel. Esey a haci cu e tempo ey, nan a mobilisa masha hende mes den e departamento hudicial hunto cu partnernan den reino pa atende cu Ospina, y tambe cu otro criminalnan cu tabata forma parti di e red. Pa tal motibo el a wordo condena y e ta pagando un  castigo pa e delito cu el a comete. Pero su fecha di detencion ta yegando su final, y un dado momento sr. Ospina Span lo sali liber y lo ta bek den comunidad  y nan ta trahando cu ne den e proceso di rehabilitacion.