Ken tabata minister di Defensa di Mexico, general Salvador Cienfuegos (2012-2018), a keda deteni diahuebs ultimo na aeropuerto di Los Angeles, segun e titular di Asuntonan Exterior, Marcelo Ebrard a revela, Cienfuego ta den espera di e acusacion di un serie di cargo cu tin relacion cu narcotrafico.
“Mi a wordo informa door di embahador Christopher Landau di Merca cu e ex-minister di Defensa, general Salvador Cienfuegos, a wordo deteni na Aeropuerto di Los Angeles na California” Ebrard a informa a traves di su red social na Twitter.
Gobierno ta na espera di conoce e diferente cargo cu oficialmente Cienfuego ta wordo acusa y ken e Departamento pa Control di Droga di Merca (DEA) a atribui caba varios delito cu relacion cu trafico di droga, entre nan e transporte y distribucion di substancia ilicito.
Ademas di e acusacionnan aki, Cienfuegos di 72 aña, ta lastra scandal pa loke ta trata su responsabilidad den varios caso di violacion di Derechonan Humano durante Gobierno di Enrique Peña Nieto, como esun di Tlatlaya, ora 22 persona a muri, of pa via di ineficiencia di Ehercito ora e 43 normalista di Ayotzinapa a wordo ataca 27 di september di 2014 pa un grupo di polis municipal di Iguala y di Cartel di Guerreros Unidos.
30 di juni di 2014, un escuadron di Ehercito a asesina 22 civil, ora nan tabata den un bodega di e comunidad di San Pedro Limon, na municipio Tlatlaya di Estado di Mexico.
Aunke ta existi varios version di loke a sucede, Comision Nacional di Derechonan Humano (CNDH) di Mexico a afirma cu esunnan cu tabata na e luga no a pone resistencia, pero cu por lo menos 15 di nan a wordo asesina di manera extra hudicial.
